«Наьсарерча керттерча дарбанчера лораш укх деношка йиъ юртара нах тӀаийбеш хилар. ГӀаьзе-Коарча, Буро кӀалхарча, Наьсар-Кертерча, Ӏалий-Юртарча маьждигашта юхе шоай машин Ӏооттаяь, цига бахархой унахцӀенон хьал тохкаш болх дӀабихьар цар», - дийцар «Сердалога» цу оагӀонцарча министерстве. Из гӀулакх наха чӀоагӀа атто еш да тахан.

ЦӀий лелара боарам миштаб хьожаш, дегӀацара шекар, холестерин юсташ хьежар уж бахархошка. Тайп-тайпарча оагӀонашкарча лорашка шоай хьал дӀадувца, дӀахо кхы чакхбала безий тахка ловш бар нах. УнахцӀенон гӀулакхех йолча министерстве белгалдечох, из болх чӀоагӀа лоархӀаме ба наха юкъера лазараш гучадахара тӀехьа.

ДукхагӀа болча нахага ха, ахча хилац шахьарашка ухаш чакхбувлаш лела, хӀаьта шоай юрта мах боацаш чакхбала аьттув лу царна. Цул совгӀа, иштта лорий машинаш дӀа-хьа ухаш дӀахьоча балхага гӀолла, моллагӀа лазар хӀетта хьакхийттача хана гучадаккха йиш я, хӀаьта ший ханнахьа гучадаьннача лазара духьалара дарба а гӀойле яхьаш да.

Из болх кхы а дикагӀа тоабеш, дӀахобахьа лерхӀ вай мехка. Лораша бахархошка дехар ду, шоай юрта иштта машин хьакхаьчача, дӀатӀадахе чакхдовла, яхаш. МоллагӀча ханага кхаьча саг хан-ханнахьа лорашка чакхвоалаш, ший дегӀа хьал миштад тохкаш хила веза.

Вайх хӀаране кхетаде деза, лораш иштта дӀа-хьа ухаш хилар боккха аьттув, наха паргӀато еш хӀама долга. ДукхагӀа долча лазарашта хӀетта хьакхийттача хана гучадаьлча, саг цох цӀенвеш дарба хул. Из чӀоагӀа лоархӀаме да, къаьстта тахан, дукха лазараш даржача хана.

«Дукха нах ба, шоаш цамогаш болгах са ца кхувш, шоай дегӀа могашал хӀара денна эшалуш латтилга ца ховш. ХӀаьта вӀалла хӀама ца лазе а, ханнахьа лорашта тӀаводаш хилча, цӀаьхха, гучадувлаш дола лазараш кӀезигагӀа хургдар», -дийцар тха газетага.

Массане кхетаде деза, кхетадеш боацарашта дӀахьалхадаккха а деза, хан-ханнахьа ший унахцӀенон хьал тохкаш хилар, духхьал иштта оттадаь хӀама хинна ца Ӏеш, вайна юкъера лазараш ма хулла эшаде, наьха могашал тоае, аьнна дӀахьош боккха, лоархӀаме, хӀаране хьаллаца беза болх болга.

Са цхьаккха хӀама лазац, аьнна, кулг тесса ца Ӏеш, шоаш дахача юрта хьабаьхкача лорашта тӀагӀо, яхаш, кхайкарал ду лораша. Сага шийна паргӀатагӀа еций ший дегӀаца цхьаккха лазар доацилга хайча, е долча лазара, гаьна ца доалийташ, ханнахьа дарба де волавелча?

Массане дӀа-хьа доаржаде дезаш, хьаллаца дезаш дика гӀулакх да из. Балха тӀерадувлаш, ха йоаеш, аргӀа хьакхачарга хьежаш, дӀаьха сахьаташ доадеш, лора наӀарга дагӀа дезац шун, из керте а лаьце, шоашта беннача аьттонах пайда эца.