Дикалах дог тийша волаш
Бӏаргашта хӏама гуш воацача сага дарба деш, гӏо дир мехкарча полице болхлоша
Вай вахаре дуккхаза а нийслу, кхыдола хӏамаш юстартетта, адамал лакхедоаккхаш бола къахетам, дог лазар гойта деза моттигаш. Иштта дола цхьа гӏулакх нийсделар вай мехка а. Сага гӏо дар мел доккха, маьл болаш да дагалаьца; шоай низ дӏа ма кхоачча новкъостал де хьежар Россе мехкарча МВД миграцеца дувзаденнараш къоастадеча оагӏон кулгалхочун декхараш кхоачашдеш йола Гелисханаькъан Хьава, бахархошца болх лоаттабеча оагӏон болхло Боранаькъан Луиза.
Чӏоагӏа халача хьале эттавар Магӏалбике вахаш вола Галай Къарамсолта Ӏалаудин. Цӏаьхха, бӏаргса дайна висавар из, хӏаьта дарба доазол арахьарча клинике мара вӏаштӏехьадоалаш дацар. Геттара сиха доазол архьа дӏаваха паспорт эшаш дар гӏулакх. Мехкарча МВД болхлой, из хӏама шоашта хезача, чӏоагӏа сагота хьайзар цу миска гӏо де. Цар кхетадора, цун хьал хӏара сахьат, минот еза йолаш этталга. Дӏаоарцагӏбаьнна, каьхаташ ма хулла сихагӏа кийча хургдолаш гӏо де хьежар уж. Цул тӏехьагӏа, бӏаргашта хӏама гуш воацача сага, цига дӏаваха везаргвоацаш, шоаш цун цӏагӏа паспорт дӏадихьар Гелисханаькъан Хьавас, Боранаькъан Луизас. Ӏалаудин чӏоагӏа цецваьнна а дега боккха тоам хинна а вар, шийна иштта терко ярах.
Могаш воацача сага чӏоагӏа лоархӏаме ма дий ший оагӏув хьаллоацилга, ший гӏайгӏа еш болга кхетадар. Паспорт дӏаденна, дукха ловцаш даьхар ӏаьдала болхлоша унахочунна. Лазар дегӏацара цӏенденна дӏакъаьста, хьалха хиннача тайпара дог делаш, хӏама сийрда бӏаргагуш волаш цӏенах кхетар дехаш, Даьлага дуӏа дир цар цунна.
Цу гӏулакхо дуккхача хӏаман уйла яйт тахан… Вай кхетаду, из тайпара хьал моллагӏча сагага дагадоацача хана кхача йиш йолаш долга. Лазар кхетаргдац, е хӏама талхаргдац аьнна бӏубенна хила йиш йолаш вац вайх цхьаккха а. Бакъда эггара лоархӏамедар да нах вӏаший къахетаме, дог лазаш, халача хьале эттачунна гӏо де кийча болаш хилар. Моллагӏча бусалба сагаца ца хилча яргйоаца оамалаш я уж, хӏана аьлча цхьаннена а хац шийна фу тӏакхоачаргда, деррига тоаденнад аьнна хетача хана дунен тӏа ше малагӏча халонашта духьалъотта везаш хургва.
Вайна массанена хоза, беркате масал да цу наха гойтар. Из мо долча хӏамаша дега тоам бу, цхьаккха хӏама кхоачаргдац-кх дикача, къахетаме волча сагага, аьле хеталу. Геттара сиха эшаш хинна паспорт, ха ца йоаеш, кийча хиларах доккха совгӏат хилар ма хулла кастагӏа лорашта тӏакхача везаш хиннача сага. Даьла боккхача къахетамга, Цун дикага сатувсаш, дарба хургхиларах дог тийша волаш, араваргва хӏанз наькъа вай мехкахо. Хьайх дог лазараш, хьоца гӏайгӏа, сагото екъараш болга ховш хилча; дуккха аттагӏа хул моллагӏча хӏаман духьалъотта, халонашта сатоха! Могаш, маьрша волаш, боккха кхаъ хинна цӏенах кхеталва из!
