Наьха хьалаш тоаде беш бола болх
ГӀалгӀайчен Юкъарча палатан кулгалхочун Ӏамархананаькъан Лейлай юбилей езъеш я
Тахан дезду ГӀалгӀай Республикан Юкъарча палатан кулгалхо, Президиума доакъашхо, Ӏамарханаькъан Лейла яь ди. Из яьй 1958-ча шера, лайчилла бетта 12-ча дийнахьа, Казахски ССра Кокчетава оалача шахьаре. Лакхара дешар дийша яьлар из 1983-ча шера Къилбаседа-ХӀирийчен Хетагуров К. цӀерагӀча паччахьалкхен университете, «психологе» даькъ тӀа.
Цун вахара наькъо хьагойт, моллагӀа халонаш хьалхашка нийсъяларах, цӀаккха еха йоацаш, Сосланбека Лейла хьайоагӀаш хилар. Из ма ярра гӀалгӀай кхалсаг я- шийна хьалхара меттел, ший гаргарча наха хьалхара а отта могаргдолаш, цхьанна сагагара новкъостал ца дехаш.
Къонача кхалсага вахара наькъ тӀа, цӀаккха дицлургдоацаш дера 1992 шу. Цхьан юкъа уж лаьца баьхкар ший кхаь бераца, цӀен-даьца. Цхьан дийнахьа, ераш лаьца боахкача чу а баьнна, дӀавигар цун фусам-да. Юхебисараш тамашийна кӀалхарбаьлар, бакъда цу хатарах йоккха чов йисар цар дегашка, цӀаккха а ерзаргйоацаш. 1992 шера хинна хатар бахьан долаш, из балха отта езаш хул ГӀалгӀай Республикан де доацаш бейнарий Комитете. Ше болх беча шерашка, Лейлас дукха новкъостал даьд гӀалгӀай дезалашта, бакъда ший гаргара саг лаха цун вӀаштӀехьадаланзар.
Социальни политика, къахьегама, наьха вахара хьал тоадара йолча комиссе доакъашхо йолаш, 2015-ча шера цо вӀашагӀделлар «Де доацаш бейнараш лахара юкъара болх бераша де дезар» яхача даькъ тӀа кхайкарал. Цо дуккхабараш тӀехьабаьхар цунна, из чоалхане дош кхоачашдара Ӏаьдала оагӀорахьара терко а таронаш а оарцагӀъяьхар.
Укх массехк шера, ший цу балха даькъ тӀа йоккха говзал хиларца, цунна дукха хӀама карагӀдаьннад цунна. «Россе Ноаной» яха Ерригроссийски моттигера организаци я цун, из я цига кулгалхо укх 12 шера.
Ца хадаш, юкъарлоно кхоачашъю йоккхий проекташ, цар таро хулийт кхалнаьха вахар аттача даккха. Сосланбека Лейла балха говзал лакха йолаш хиларах, цун цу даькъ тӀа карагӀдоалар юкъедоаладе таро хилар ГӀалгӀай Республикан «Къаман даьй-ноаной ассоциаце» балха.
Россе массаза, дуккхача шерашка лоархӀаш ба наьха къахьегам, юкъарча хӀаманца цхьана хилар. 2017-ча шера, «ЦаӀ йолча Россе» «Къахетаме хилар» яха орден елар ГӀалгӀайчен виъ сага. Царна юкъе яр Сосланбека Лейла, цо таро йоацача фусамашта дукха новкъостал даьд.
Кхо шу даьнначул тӀехьагӀа, цунна елар Россе Юкъарча палатан Сийлен грамота.
Белгалдаккха дезаш да, чӀоагӀа дика хеташ, тӀаийцар цо шийна Российски Федераце Юкъарча палата секретара гӀончас Бочаров Вячеслава «Юкъарлон декхараш кхоачашдарах» яха мейдилг ялар, из елар, 2023 шера лайчилла бетта.
Цун вахар даим дувзаденна да ший хьамсарча мехка бахархой вахарца.
Сосланбека Лейлайна доагӀаш, тахан дукха хоза дешаш аьннад. Ший аргӀагӀа «Сердало» яхача Издательский цӀен болхлоша ловца боаккх; иштта хьинар, ираз долаш, дӀахо а цун вахар хилар ловш.
