Патриоташта дагадоагӀа
ГӏалгӀайчен викалаша дакъа лаьцар, «Каспий» яхача кагирхой кхетаче
Селий мехка дӀайихьар хӀара шерара кагирхой «Каспий» яха дешара кхетаче. Из дӀахьош яр «Прибой» яхача Избербаш-Шахьара санаторе, цига дукха таханарча заман кагирхой гулбелар, уж кийча бар шоашта ховш дар декъа, дуне дикача оагӀорахьа хувца. ГӏалгӀайчера а дукха викалаш бар цига. Уж бар шоай кердача балхашца, проекташца баьхка хинна кагирхой политикан, туризма Минисетрствон викалаш; иштта «МагӀалбик» яха тохкама отряд.
Массаза шоаш дӀахьош болча балхах тарра, «МагӀалбик» яхача тохкама тоабо «Каспий» кагирхой кхетаче дакъа лоац «Патриотически кхетам балара даькъ тӀа. Укх наькъа царца из болх бекъаш яр «Кавказ» яха моттигера тохкама тоаба, иштта Волгограда, «ГӀашло» яхача тӀема-исторически клуба доакъашхой, царна керте вар историк, кагирхой хьехамча Артамонов Анатолий.
«Патриотически кхетам балара» даькъ тӀара болх дика дӀабихьар цар. Уж дар герга истолаш, Селий мехка дагалоаттама моттигашка бахар, тӀема-исторически кердадарашка дакъа лацар, юкъарлон доакъашхошца кхетаченаш дӀаяхьар, кагирхошта лаьрхӀа йола денала урокаш чакхъяхар», - аьлар «Сердало» газетага «МагӀалбика» тохкама тоабан кулгалхочо Дзейтанаькъан Беслана.
ГӏалгӀайчен тохкама кхетаченаш хилар, шоашта дукхача хана денз бовзаш болча новкъосташца. Уж бар Сербера ена «Тӏема вошал» яхача юкъарлон организаце викал Литвина Ольга, Делич Светлана, инарала Делич Божидара йоӀ. Божидар Делич 1995-1999 шерашка 549-ча Югославе Герзашцарча Низий механизированни бригаде волаш, тӀема юкъе дакъа лоацаш хиннав Косове, Метохе.
Массехк шу хьалха, Сербе викалаша «Каспий» кхетаче денадар, немций моастагӀех Сербе лаьтта мукъадоаккхаш бейна Къилбаседа Кавказа красноармейцаш дӀабехка боахкача хьахиннача гаьн тӀара бӀараш. ГӏалгӀайчен тохкамхоша лорадеш дӀадийнадар уж, тахан уж дика дегӀадоагӀаш да, МагӀалбика дагалоаттама моттиге - Россе тӀема сийлен шахьаре.
Из хайначул тӀехьагӀа, Серберча новкъосташа аьлар ГӏалгӀайчен, Сербе доттагӀала алея, иштта МагӀалбике турпалхой Беш хьакхеллача бакъахьа я, хӀанз дегӀадоагӀаш латтача бӀарий гаьнашта уллув Сербера бӀарий сорт а хургдолаш.
Из хьаллаьцар ГӏалгӀай мехка, Сербеи, ГӀалгӀайчени викалашта юкъера доттагӀал цӀаьхха хоттаденна дацар «Каспий» кхетаче. Сербена дика дагайоагӀа Приштине хинна цӀихеза марш-бросок, ВДВ эпсар Евкуранаькъан Юнусбек хьалха волаш, цар хьаяьккха хинна Косовера «Слатина» аэропорт.
Цу хана дӀайихьача тӀема операцен цӀи хазар хӀанз а дицдаланза да, бакъда цу хана НАТО тӀаяьржа хиннача Сербе къаман дика хов, ше Россе цӀаккха а кӀалдутаргдоацилга.
