Дукха ха йоацаш, цунца тӀема гӀулакх леладеш бола болхлой бахар шоай новкъоста, капитана Маценаькъан Рамзана нана йолча. Ший тайпара безамеча вӀашагӀкхетаро, иштта ловцаш дахаро цхьайолча хана уйла яйт укх дунен тӀа эггара лоархӀамерчун. ХӀара сурт хьагойташ, цунца дувзаденна цхьацца хӀама дувцар кхалсага, уж сурташ чӀоагӀа лорадеш леладеш хилар а гуш дар.

Ший хана Мусай Радимхана кхачан промышленноста технолог яха говзал караерзайир, цо иштта дукхача шерашка къахьийгар кхален совета депутат йолаш. Цунна, депутат яр аьнна, цхьанна а оагӀорахьара новкъа хиланзар кхо воӀи цхьа йоӀи кхеде. Ший дезала тӀехье дӀайолаелча, кхы а сийрдагӀа хилар цун вахар.

«МоллагӀа кхалсага шийчарел тӀех цхьанне а дезал хетац. Сабараш а ба иштта: шоашка аьннар деш, сабаре, бехктокхаме болаш. Уж массаза хиннаб шоашка аьннар деш, шоашта луш бола хьехам дӀаэцаш, дешара тӀакхувш», - йоах цо.

Цун цӀагӀара Рамзан хинна Ӏац тӀема гӀулакх леладеча даькъ тӀа балха. Дукхача хана денз, хьамсара мохк лорабара йола уйла ший виӀий кхоачашхургйолаш дакъа лаьцар нанас а. Цо хьаллаьцар из уйла, цудухьа дика толамаш даха а таро хул балха даькъ тӀа, цунца цхьана ший къаман а пайда бахь.

Белгалдоаккх, ши-кхо ди хьалха къонгий Ди дар дездеш. Уж Денош вӀаший гарга хиларо хьагойт берий а даьй а бувзам чӀоагӀа хилар. Оалаш долча беса, йоӀ - наьна дегагӀозале, воӀ - чӀоагӀале.

«Эггара лоархӀамегӀа йола кӀийле я, нана цӀагӀа хьежаш хилар. Цар безамо новкъостал ду хьалхашка нийслуш йола халонаш юстаръяха, иштта декхараш кхоачашде. Беррига ноаной бахалба шоай дезала, гаргарча наха юкъе дукха, ираз долаш», - дега йӀовхалца дувц капитана.

Радимханá, Ӏаьдало баркал оалаш деннача каьхато тешал ду, цо дезал кхебеш, царна нийса хьехам луш, мехка турпалхой уж хургболаш хьийгача къина лакха мах беш хилара. Росгварде болхлоша капитан Маценаькъан Рамзан, бокъонаш лораяра декхар кхоачашдеча, массахана масал эца увттаву.