Сийлахь-боккхача Даьймехка тIема юкъе, шоай деналца дуккхабараш цецбоахаш лаьттача вай къаман сийдолча бIухой никъ хьаийца, дIаволавелар Iаьла. Цу бIухоех цаI вар цун даь-да Мухьмада воI Хьасан. 18 шу кхаьча волаш моастагIа вохаве араваьнна, Одессерча фецарча кемаца эскаре кхаьчар из. 1944-ча шера, шийна тIадилла тIема декхар кхоачашдеш, чIоагIа лозавир Хьасан. Цул тIехьагIа, дерригача къаманца бирсача, хийрача Казахстане вигар. Даьймехка ваьлар из 1962-ча шера. 

Фашист вохавеш яьккхача коталон укх шера 79 шу доал… Новразанаькъан Iаьла, из санна бола яхь йола къонахий, Даьхен гIулакха латташ ба тахан, шоаш дIа мел кхаьчача майрал гойташ. ТIема операцен доакъашхо волаш, массехк командировке хилар из. ТIеххьара из хинна моттиг, валараи вахараи юккъе из вуташ, эггара халагIчарех яр. Цун йишас дувцачох, Iаьлийгара цхьаккха тайпара хоам, бувзам боацаш, ха эттар, 2024-ча шера бIаьстан хьалхарча бетта 11-ча дийнахьа. Бувзам хаьдабар, из де доацаш байнарашта юкъе лоархIаш вар. Йоккха юкъ ялалехь, цунца цхьана тIема операцен юкъе дакъа лоацаш волча бIухочо телефон техар, Iаьла дийна вац, аьнна.

Бакъда, ший ираз хиларах, из дийна висавар! Ерригача ротанна юкъе дийна висар из цхьа саг вар! Ший мел долча деналца, низаца духьалъэттавар Iаьла цу унзарча хьала. Шийлача подвала чу хий доацаш, цхьаккха кхача боацаш вагIаш, когаш гIорабаьбар цун. Никъ бовзаш хиларах шийчарех дIакхийтача а, унзарча хьале нийсвелар из. Дронашца чухьелхача моастагIаша къахьа ди оттадир цига. Ший аьттув боаллашехь, эггара хьалхарча аргIагIа йишийга телефон техар халача хьале нийсвеннача бIухочо. Цхьаккха тайпа дешаш тоъаргдац, из дийна волга дIахайча; цун цIагIарча, гаргарча, вовзаш, везаш болча наьха гIадбахарах дIадувца! Телефон теха, цун хьал миштад ха аьттув баьлар тха. Госпитале дарба деш ва Iаьла тахан. Хозача хьехамца кхеваьлга гуш, беркате оамалаш ший дегIах йоахкаш, саг ва из. Вайна массанена лоархIаме дола дешаш, аьлар цо.

- Эскаре амал де ухача вай кагийча нахага, боаггIача боараме шоай декхараш токхаш, шоаш хьадаьннача къамах йоккха цIи йоаккхийташ, сий долаш, яхь лораеш, чакхдовла аргдар аз. Эскарера амал хеттача беса хала хилац. Ха-м сиха дIайода, цига Iомадаьраш дунен тIа вахаш накъадаргда хIаранена,- белгалдир Iаьлас. «Сердало» газета тоабо иразе, беркате ваха даькъалавувц Iаьла. ДегIа могашал меттаэтта, аьттув болаш, хIанз санна къаман яхь лораеш, дуккханешта хоза масал долаш вахалва! ТIема операцен юкъе дакъа лоацаш мел бола бIухой, шоай декхараш дизза текха, могаши маьршеи болаш шоай цIенах кхеталба!