ГӀалгӀай къаман
юкъара газет

Боккха болх

«Газпром межрегионгаз Наьсаре» яхача моттига кулгалхочо пресс-конференци дӀайихьар

24.12.2024 14:50

«Газпром межрегионгаз Наьсаре» яхача оагӀон керттерча моттиге пресс-конференци дӀайихьар кулгалхо волча Лаьнанаькъан Элберда. ВӀашагӀкхетаре дийцар укх шера дӀабихьача балхах, иштта тӀадоагӀача шера кхоачашде дезарех. Из хоам «Сердало» газетага бир цу моттигера.

«Шу чакхдоалаш белгалде лов сона, Даьла къахетамца вай дикка къахьийгалга. Боккха болх ба 2024-ча шера дӀабихьар, дӀахо дӀабахьа безар, хӀана аьлча газ йоагаераш хӀара денна дукхагӀа хулаш латт мехка. БоаггӀача боараме дӀаходолхача деношка а къахьегаш, лакха толамаш доахаш дӀадаха деза вай», - аьлар Лаьнанаькъан Элберда.

 Республикера газацара хьал тоадеш, газ чуюллаш болх дӀакхухь. Белгалде деза, вай республика «Газпромо» бахархошта газ чуюллаш йолча РФ моттигех цаӀ йолга. Цунга хьежжа, 2030-ча шерга кхаччалца газаца дӀадахьа дезача балхашта лаьрхӀа 30 млрд сом рузкъа къоастадаьд. Тишденна, дика доаца газацара гӀирсаш хувцаш къахьегаргда болхлоша. Шоаш бахача доазонна, мах бала ца безаш газ дӀатӀаяхьа аьттув хургба мехкахой.

«Нах бахача моттигашка газ дӀатӀахьош дола гӀулакх тахан во латтац, бакъда, кхы а дикагӀа тоаделча дика хетар,- дувц Элберда. - Шоай доазон каьхаташ наха боаггӀача боараме цалеладарах, цхьадола дехар хьаэца йиш йолаш хилац тхо; цунга хьежжа, боагӀаш бола болх дӀабахьа а аьттув хилац. Кулгалхо волча сона, иштта тха берригача болхлошта лоархӀаме да бахархой оаха дӀабихьача балха раьза хилар, мегаш тӀаэцар. Вай моллагӀча мехкахочун санна, гаргара, бовзаш, безаш нах ба са а, царга гӀолла хьахоз газ чуюллаш баьхкача болхлошта мел раьза хиннаб нах. Цхьайола моттигаш кхоачамбоацараш долаш хул, цхьайолча моттиге аьннар бух боацаш, бакъдоаца къамаьл хул. Из деррига аз дика кхетаду. Эггара лоархӀамегӀдар - хӀара денна болх тоабеш дӀадахар. 2024-ча шера кхоачашде аьттув ца боалаш дисараш а да, бакъда къахьегаш да тхо хӀара денна, тахан ца гой а, кхоана гуш хургда деррига. 2025-ча шера дикка къахьегаш дӀахохьоргба оаха тхоай болх. Бахархой раьза болаш хилар чӀоагӀа лоархӀаме да, хӀаьта оаха къахьегаргда цу наькъ тӀа дикка», - дийцар Лаьнанаькъан Элберда.

 

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде