ГӀалгӀай къаман
юкъара газет

СКФО 15 шу дуз

Россе федеральни куран цӀай

ГӀалгӀай мохк а болаш, 7 моттиг чуйодаш болча СКФО оалача куран 15 шу дуз. Дукха да цу юкъа вахара-экономикан хьал тоадеш, культуран вахаре, къамашта юкъера бувзам чӀоагӀбеча де аьттув баьннараш. Йоаржаяьй мехка пайда беш йола тайп-тайпара дукха федеральни проекташ, иштта кхыдараш.

2010-ча шера Ӏан шоллагӀча бетта 19-ча дийнахьа президент хиннача Медведев Дмитре амар денна вӀашагӀъеллар СКФО. Цу юкъе чудахар Селий, ГӀалгӀай, ГӀаьбартой-Балкхарой, Черсий, ХӀирий, Нохчий доазонаш, Ставрополь. СКФО административни керттера моттиг лоархӀаш йола Пятигорск моттига столица цахилар тамашийна хеташ хӀама да…

ГӀибухерча федеральни моттига юкъера уж 7 мохк хьакъоастабар цар хьал ма хулла тоадара тӀехьа баьккха гӀа бар. Цох лаьца хьоахадир СКФО РФ Президента массазара викал волча Чайка Юре. 2010-ча шера денз, хьалъяьй 72, 3 млн кв. м латта гӀишлош, хӀаьта хьайбаех хьадоалаш дола беркат массехказа айденнад. Къилбаседа Кавказера курорташ тайп-тайпарча моттигашкара дукха туристаш тӀалатташ я тахан. Чайка Юре белгалдир; уж курорташ хана йӀоахалца цӀихезача йоккхача моттигашта нийса адам тӀалатташ хургья, аьнна. 2010-ча шера денз, кхозза дукхагӀа яьржай санатореш, гостиницаш.

Эггара керттердар - адам къахьегаш хилар. Массазарча моттигерча викалаша теркалдечох, къахьегаш бола нах тахан 3, 6 миллион тӀара 4,5 млн сагага кхаьчаб. Чайка Юре теркалдечох, болх хьабе моттигаш Ӏалашъяр да из. Болх боацаш хилар СКФО 16%-гара тахан 8, 1%-га кхоачаш лохденнад. Экономически хьал хоалуш тоадалар да из. РФ Паччахьалкхен кулгалхочун гӀонча волча Новак Александра теркалдир, СКФО вахара- экономикан гӀулакх тоалуш доагӀилга. Массайолча моттигашка керда гӀишлош хьалъеш, фабрикаш, заводаш йолайолийташ, юртбоахама оагӀонцардараш тоадеш, бахархошта газ дӀатӀакхухьаш, боккха болх ба дӀахьош латтар. «СалаӀа, дегӀа могашал меттаоттае, бизнес дӀайолае дика моттиг хулаш латт Къилбаседа Кавказах.

Федеральни оагӀонцарча, моттигашкарча хьакимаша, бахархоша цхьана дӀабихьа боккха болх ба из. Къилбаседа Кавказ хӀара денна тоалуш, дегӀайоагӀаш хургйолаш, даим къахьегаш латтарий низ ба цу юкъе»,- белгалдир Новак Александра. Къилбаседа Кавказа бахархой даькъалабувцаш, цар белгалдер хьаллаьцар вай мехкадас Келаматанаькъан Махьмуд-Ӏаьлас. Йоккха йоацача хана, дикка гӀа баккха, дукха хӀама кхоачашде карагӀдаьннилга теркалдир республикан кулгалхочо. Политически, экономически оагӀонаш хьаийцача, 15 шера дукха лоархӀамедараш чакхдаха аьттув баьннаб.

«Доккха баркал кхайкаду аз Чайка Юрена, РФ Президента СКФО массазарча викала администраце гӀо дарах, ГӀалгӀай республикан эшашдар теркалдеш хиларах, доккхий декхараш кхоачашдеча моттиге новкъостал лоаттадарах», - язду ший вахара оагӀонашка вай Мехкадас.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде