Тешшаме ала йиш я, республикан доазон тӀа дика къахьегаш я кхычарца нийсъяла йиш йола, таханарча заман заводаш, фабрикаш. Царех цаӀ я «Техстрой» ООО яха полимерни турбаш арахеца моттиг.

Цу заводе оттабаь къахьегама гӀирс, иштта продукци арахецара йола чоалх, карарча хана Российски Федераце йолчарна юкъе дикагӀчарех цаӀ лоархӀаш я.

Полимер яха материал хьалхле лелаеш йолча технологех я, тайп-тайпарча балха даькъош тӀа лелаеш а я.

ХӀара шу массаза доал, цу завода арахецаш дола хӀамаш дукхагӀа эшаш хул, цудухьа цу предприяте таронаш дӀахо шеръе а йиш я.

Уж полимера хӀамаш арахецаш хилар тахан чӀоагӀа накъадоалаш да хий чудуллача, начӀас дӀаухача, газ чуюллача, кабелашта лаьрхӀа йола турбаш дукха эшаш хул; цул совгӀа, гӀувнаш йоахача, вахаре эшаш йолча кхыча моттигашка лелаю уж. Эшаш я уж массанахьа.

Тахан ГӀалгӀайче кхоачашдеш да мехкдаьттангазохимически даькъ тӀа латташ дола декхараш, царех дийцадар ший хана Россе президента В. В. Путина. Предприяте дика къахьегаш хилара гойтам ба, эзар тонн из продукци арахийца хилар.

Шоаш хьажа бахача юкъа, Москвера баьхкача безача хьаьшаша мах оттабир мехка промышленни, халкъа исбахьален гӀирсий предприятешта карагӀдоалачунна. Цул совгӀа, гойтар цӀихеза, мехкашта юкъера минпромторго чӀоагӀъяь проект - кӀалах гӀирсаш деш йола предприяти.

Из болх беш хиларах тарра, дӀаязъяьй российски 11 компани. Цу кӀийлен тӀа шоайла гӀулакхаш леладе барт баьб Московерча, Воронежерча, Рязанерча областашца, Краснодарски оагӀонца, иштта РФ кхыча моттигашца.

Карарча хана, кӀалах гӀирсаш деш йола массехк моттиг хилар бахьан долаш, ГӀалгӀайче кхоъ цхьатарра бола болх вӀашагӀбелла дӀахьош ба, цу юкъе я РИАК яха кӀалах профилаш ю завод, РИАЛ яха литейни завод.

Йоккха терко тӀаяхийтар Мантуров Дениса истингаш деш болча балха, чкъаьран цӀоках деча гӀирсашта, аьшк тувсаш беш болча балха, совгӀаташ хьадара. Белгалдоалаш начӀал хилар а, ший гӀулакх дика довзаш хилар а да из, яхаш, дийцар цо.

Мехка карагӀдоалар довзийташ йола аргӀанара моттиг хилар «4БРА» яха тӀабувхабу гӀирс тегаш йола моттиг. Укхаза болх дика вӀашагӀбеллаб, барзкъа тегача промышленноста цох доккха новкъостал а хул. Цига къахьегаш бола говзанчаш кийча ба, эггара чоалханегӀа дола декхар кхоачашде, эшача боараме моллагӀа дола заказ хьаэца, бакъда цхьа кхоачамбоацар да, болхлой цатоъаш хилар.

Мантуров Дениса белгалдир, уж болхлой Ӏомабара дола декхар кхоачашде дезаш хилар, цунна чуйоагӀаш йолча колледжашка, вузашка. Цул тӀехьагӀа болх Ӏомабеш предприятешка къахьегаро таро хулийтаргья сага карагӀдоалар гучадаккха, цунца ювзаенна наьха балха говзал лакхъе.

Ше вайцига вена хилара мах оттабеш, вице-премьера Мантуров Дениса белгалдир, цига къахьегача болхлошта массайолча оагӀорахьара новкъостал лоаттаде дезаш хилар, арахецаш йола хӀамаш дукхагӀа а хила езача беса дикал йолаш а хургйолаш. Цар балха тӀара йоагӀа йоал, республика дегӀайоалаяра дӀаяхийта еза.

Лоацца аьлча, ГӀалгӀайчен промышленни, экономически даькъ тӀа карагӀдоалар совдоаккхаш хила деза, цу даькъ тӀа хьадеш дар овсаре хургдолаш бола никъ лаха беза. Республикан Ӏаьдал, цунна чудоагӀаш дола боахамаш, гӀулакхаш леладу моттигаш, предприятей къахьегамхой уж декхараш кхоачашде кийча ба.