ХӀаьта интернета оагӀонашка вайна гу, из во доаржадерашка эгӀазбахача наха барт бетташ. Хеталу, боккъонца во доаржаде ловча сага, е доккха хьаькъал доацараша летаю-хьогӀ уж нувхаш, аьнна. Ишта а хила йиш ма йий…

Геттара чӀоагӀа йӀовхал латтача хана, эзараш йолча Ӏоакъингаша маьлха зӀанараш тӀаоз; цӀи сенна уж йӀохъелча, гонахьа яда нувхаш яга йолалу. Сага ший беша йийзача цӀера юкъера йоагаш йола тов, цӀагарг, доагаш латта каьхат е кхыйола хӀама михо миччахьа дӀахьу.

ХӀаьта Ӏимецача дийнахьа, деррига йӀовхалах кхорзденна латтача хана, цӀи яла кхы фу эш? Дикка хьежача а лоралургбац юрта йисте, адам доацача нувхаш Ӏокхувсаш лелараш, даггара цӀераш ма летае яхаш кхайкарал деча деношка, кхаьч-кхаьчача цӀераш етташ коара нувхаш йоагаераш. Паччахьалкхен моттигий кара тахан дукха да! ГӀетташ долча гӀирсашца гучабаха беза нийсачунга бовла ца тугараш!

Тахан хьадаьннача саг чувоацаш гӀетташ долча гӀирсашца, сага пхьарсах доалла сахьат тӀехьа зе йиш я, хӀаьта аргӀешка гӀолла нувхех етта ше цхьаь йода машин-м хӀаьта а… Полице болхлошка хоам бе мара безаргбац. Нувхаш, къоастаеш, дӀакхувсаро тоадергдар из хьал; бакъда таханарча дийнахьа вайна гу, дукха дувцаш, кӀезига хьадеш! Еррига нувхаш цхьаттара Ӏаьржача пакеташка дӀачухьекхе арайох наха, нувхаш дӀакхухьараша тӀаетте дӀакховс… Цигга, маьлха кӀал, цӀийлуш ядаш, кӀур аха йолалу, тӀаккха ала дӀа-хьа барж массанахьа.

Нувхаш, къоастам беш, лаьрххӀа оттаяьча контейнерашка Ӏочукхувсаш хила еза, тӀаккха цу гӀулакхах йолча заводе дӀайихье чакхйоах. Иштта да совъяьнна юа хӀамаш дӀакхувсара гӀулакх а.

Къоастам беш дӀакхувсаш хилча, лаьттанна пайда беш хургьяр уж. Нувхаш чакхйоахаш йола заводаш ца тоъача хана, массане керте лаца дезар цаӀ да: эрий ара, маьлха кӀалха тайп-тайпара нувхаш цайоаржаяр! ДукхагӀа дола хатараш даржара бехке саг ше ва! Леладечун уйла еш, кӀеззига кхетам лакхбеш, гонахьарча моттигий, Дала хьаденнача хозача Ӏалама, дунен уйла еш хила деза вай, тӀаккха даргда вай хьал аттачахьа!