2001-ча шера тушола бетта 15-ча дийнахьа Наьсаре ваьв Адам. Бокъонаш лораяра болх мишта хила беза гуш хьалкхийнав из, бера хана денз.

«Кхувш латтача хана дукха уйла йора аз бокъонаш лораярах болча наькъ тӀа къахьегарах, - дувц Адама. - Дас дӀахьош хиннача гӀулакхах масал хилар са дега. Ше кхо ца веш, зуламхошта духьала цо боккха болх дӀакхухьаш гора сона. Майра дегаш дола, денал дола Ӏаьдала болхлой лакха моттиг дӀалоацаш бар са дег чу. Сай да санна, наьха кхерамзле лораеш, цар бокъонаш меттаоттаеш, дунен гӀулакхаш нийсача наькъ тӀа дахара тӀехьа къахьегаш хила ловра сона. Цхьадолча даькъе, сай дас хьабена никъ ба тахан аз дӀахохьор».

Дагалаттар кхоачашдара тӀехьа, 2018-ча шера Санкт-Петербургерча РФ Тохкама комитета академе деша эттар Адам. «Академерча дешаро сона дукха хӀама довзийтар, бокъонца волча тохкама болхлочун никъ мишта хила беза, малагӀа оагӀонаш керте оттадеш къахьега деза кхетадир аз, - дувц Адама. - Хьехархоша, духхьала хьийха ца Ӏеш, шоай балхаца шоаш Ӏомадаьраш, тхона кхоана накъадаргдараш довзийтар. Боккхача, барттайнача дезала юкъе доахкаш санна дар тхо цига. Массахана дагалаттар сона да, цо хьалхадаьхараш, из сайх тешаш хилар деза дар сона».

2023-ча шера тӀехдика дешаш академи чакхъяьккхар Адама. Дика дешаш чакхваларга хьежжа, РФ Президентаца хиннача академе толашагӀа болча дешархой кхетачен юкъевихьар из. «Лакхерча кулгалхочо боккхача новкъа накъавоаккхаш даь къамаьл, Даьхе лораеш чакхваргва со, аьнна, биа дув санна дар сона, - дувц цо. – Аз кхетадора, сайна тӀалатта декхараш цхьа моллагӀчарех доацилга. Мехкара гӀулакхаш лорадарал совгӀа, сай да сайх тешаш хилар доаде йиш яцар са; цунга хьежжа, бахьа беза никъ чоалхане бар».

2023-ча шерарча аьтинга бетта мехка цӀавера Адам. Кхаленашта юкъерча Наьсарен тохкама моттиге дӀаболабир цо ший къахьегама никъ. Хьалхарча дийнахьа денз, ший декхараш довзаш, дукха хӀама довзача кулгалхошкара, уллуврча новкъосташкара цхьацца хӀамаш Ӏомадеш, дӀаволавелар из. Эггара халагӀа цун балха тӀа хинна гӀулакх, цхьан министерстверча хьакима даь зулам гучадаккхар дар. Паччахьалкхен дикка зе даьдар хьакима, ший балха тӀа цхьацца бокъо йоацараш леладаь. «Из цхьа моллагӀа гӀулакх дацар, - дувц Адама. - Бехке волча хьакима ший хур дир тохкама болх кегабе, тхона кхерам тасса гӀерташ, бакъда тхо юхадалацар. Дикка къахьийга, цо зулам даьлга, из бехке волга хьагойташ дола хӀамаш гулдир оаха».

Ший балха тӀа Адама лорадеш цхьа хӀама да – бе-башха доаца хӀамаш хилац, моллагӀа зӀамига да аьнна хетар а шийна тӀехьа зулам доаржадеш хила йиш я. Эггара керттердар - нахага ладувгӀа, царна къувлар фуд ховш хила веза, могаш дола гӀо деш ураотта веза хало тӀакхаьчача сага.

«Тохкама болхлочо хьегаш дола къа наьха халонашца, цар вахарца дувзаденна да,- йоах Адама. – Массахана нахага ладувгӀа, цар мичахьара лаз, царна фу къувл тахка хьож со. Дас сайга аьннар дагалоаттаду аз массахана: моллагӀа хало кхачарах, саг волаш дӀачакхвала веза хьо, сий лорадеш, яхь йолаш дӀадахьа деза хьай гӀулакх».

Юстице воккхагӀа вола лейтенант тохкама болхло хинна Ӏац, ше хьаийца никъ мел бехктокхаме ба кхетадеш вола болхло ва из, ший гӀулакх нийсача оагӀонца дӀадахьа гӀерташ ва. Къонача эпсарашта хоза масал да из, дукха да цунгара хьаэца. «Россе тохкама комитета эпсар се хиларах, аз тахан доаккхал ду, - йоах Адама. – Тохкам дӀабахьар яхар духхьала болх хинна Ӏац, деналца, бакъдолча хӀаман тӀехьа волаш дӀачакхвала веза моттиг я из. Из гӀулакх боаггӀача боараме дӀадохьалургда, аьнна, хет сона сайга, сай даь визза воӀ волаш, цун хьехам биц ца беш».