Хувцамий ха
Мехка къаьнара санатори-хьун ишкол кердача хьисапе духьалъоттаргья бахархошта
Укх шера бӀаьсти, хозача Ӏалама юкъе, Галашка хьалъе йолайир Чаненаькъан А. цӀерах йолча Республикерча санаторе-хьун ишкола лаьрхӀа керда гӀишло. Юртара моттигаш таханарча ханага хьежжа тоаярах йолча федеральни проектага гӀолла дӀахьош ба из боккха болх. Юртий хӀама меттадоаладарах йолча паччахьалкхен программанна юкъе чуйодаш я из проект.
«Санаторе-хьун ишкола укх шера 95 шу дуз. Дуккхача шерашка дегӀа могашал эшаеннача берашта гӀо лоаттадеш моттиг я из. Вай декхар да, дегӀа могашал эшаенний аьнна доацаш, бера деша, ший начӀал доаржаде аьттув луш йола моттиг хилийтар. Федеральни оагӀоно гӀо дарца, таханарча хано дӀадеххача тайпара из моттиг меттайоалае аьттув ба вай», - дийцар тхога Мехкадаь зарбан болх лелабераша. Керда гӀишло цига хьалъе, аьнна, Мехкадаьга дехар даьраш Галашка бахаш бола нах бар. Нах леткъачул тӀехьагӀа, Келаматанаькъан Махьмуд-Ӏаьлас лаьрхӀар из моттиг федеральни программанна юкъеяхьа. Мехкадас тӀадилла, юртбоахама гӀулакхех йолча министерствос цу оагӀонца эшаш мел дола каьхаташ кийчдир.
Галашка керда санаторе-хьун ишкол хьалъеш хилар вай мехка лоархӀаме да. Таханарча ханага хьежжа йолча цу дешара моттиге ха яккха йиш йолаш хургба, цу юртара нах санна, гонахьа ядача юрташкара бахархой а. Цхьацца бахьанашца дегӀа могашал эшаенна бераш да цига ха йоаккхараш, дешараш. Берий дегӀа хьал меттаоттаде эшаш мел дола хӀама да цига. ХӀаьта керда гӀишло хьалъяь яьлча, цигарча бахархошта болх бе моттигаш хургья.
Из а геттара лоархӀаме да юрта бахача наха, тахан болх бе моттигаш ца тоъача хана. Керда гӀишло 120 сага моттигаш луш хургья. Из проект йоаржаяр вай мехка боккха лоархӀам болаш да. 500 миллион сом рузкъа да, деррига дӀалаьрхӀача, цу моттиго дӀалаьцар. Карарча хана лард Ӏочуйотташ боахк цига болхлой. Йиллача ханага хьежжа чакхбаргболаш дӀахьош ба болх. Укх шера цу оагӀонца кхоачашде лерхӀараш дукха да; пенаш хьалдетта, тхов тӀабилла, еррига коммуникацеш дӀачуяхьа лерхӀ цига. 2026-ча шера чура балхаш йистедоахаш, эшаш мел йола хӀамаш, гӀирсаш дӀачухьош, гонахьара доазув меттадоаладеш къахьега лерхӀ.
Белгалде деза, керда гӀишло хьалъеш бола болх тахан бераша дешаш йолча моттига новкъарле еш боацилга. Юххьанца иштта лаьрхӀар из, болх дӀаболабалале. Деррига балхаш йистедаьлча, боаггӀача боараме дешара гӀулакх дӀадахьа, дегӀа могашал меттаоттае аьттув бола, шортта моттигаш йола ишкол хургья мехка. Галашкарча санаторе-хьун ишколе-интернате бераш бӀарччача шера деша, паргӀатта ха яккха йиш йолаш да. Берашта дегӀацара низ меттаоттабе гӀо деш йола моттиг я из. Берашка массахана хьожаш лораш, спорта моттиг, юкъеяьха тайп-тайпара секцеш, иштта кхыдараш а да цига.
Ма дарра аьлча, моллагӀча бера мел дезаш дола хӀама долаш да цига. Берий дегӀацара начӀал, говзал гучайоаккхаш кружокаш лелаю цига, иштта моллагӀча тайпара книжкаш хьахаржа йиш йолаш библиотека а я. Цул совгӀа, царна лоаттабеш бола кхача, берий дегӀа эшаш мел дар юкъехьош кийчбеш ба. Ишколе болх беш йола тоаба 56 сагах латташ я. Уж ба хьехархой, тренераш, лораш, иштта технически оагӀонцара болхлой.
Хан-ханнахьа лорашка чакхбоахаш, царна чаме хеттача тайпара дола даар лоаттадеш, спортаца бувзам лелабайташ, дегӀа низ меттабоалабе, дукха хӀама довза гӀо деш болх лоаттабу берашца хӀара денна.
