Иштта дале а, цхьадолча мехкашка гендерни оала хьал юкъедаларо цецвоаккх. ДукхагӀча къамий Ӏадатех, хьалхара дезалхо воӀ хилар лоархӀаме да, хӀана аьлча из тӀехьален корта ба, цул совгӀа, да-нана къаделча царна дола новкъостал а да.

21-ча бӀаьшерен юххье, Инде мехка йоккха башхало ессар наха юкъе. МаӀанах дуккха а дукхагӀа бар кхалнахал. Цунца дувзаденна, кхал берий гӀулакха йолча Министерствос чӀоагӀдир къаман йиӀигий ди. Из цӀай хиларах, юкъарлон моттиг дӀалоацаш ба кхалнах, цар иштта юстарйоаккх, маӀача наха а кхалнаха а юкъе хулаш йола барт эгӀара моттигаш.

Къаман йиӀигий ди нахацара нийсхо лелаяра болча балха тӀа а накъадоал.

Из лаьрххӀа дола ди бахьан долаш, Инде бахача наха йоккха кхетаченаш вӀашагӀъехк, уж дӀахьоча хана тайп-тайпара проекташ гойт, уж хетаяь хул йиӀигашта кхетам балара, уж дика кхеяра.

ХӀара шера, наджгоанцхой бетта 24-ча дийнахьа, юкъарлонна болхлоша онлайн-марафонаш ю, цига дакъа лоацаш хул тайп-тайпарча къамех бола нах, цар хьалхадоаккх йиӀигаш кхеяра йола бокъонаш малагӀаш я, цар йоакхо еш хила дезилга, иштта цунца дувзаденна кхыдола хаттараш а цига дувц.

Из цӀай долча укх 17 шера спортивни яхьаш а цу юкъейоагӀаш хиннай. Кхетаче йолаш цига дакъа лаца боагӀа бӀарчча дезал, цо хьагойт из ди эшаш юкъедаьккха хилар а уж нийсхон тӀехьа хилар а.

Сага ше укх дунен тӀа мел вах дикача хӀаман тӀехьа мел дола мах бараш лораду, къаьстта ший къаман Ӏадаташ. ХӀанз ГӀалгӀай паччахьалкхен университете 430 Инде мехкара саг ва дешаш. ДукхагӀа йола тоабаш йиӀигех латташ я.

Из лоархӀаме ди тӀакхоачаш, цар дувц ГӀалгӀайченах лаьца, уж хьож шоай культура, вахар довзийта.

Хьалхарча курсе ягӀача студенткас Приянши Сони яхачох, дика да кхалнаьха шоай йоккхий таронаш хилар.

«Тхоца, йиӀигашца, нийсхо лелаеш хуле, тха вахар сийрдагӀа хургда», - йоах соца къамаьл дечо.

Хургйола лор тешаш я индианкай а, гӀалгӀай а йиӀигий вӀаший тара дола вахара хьалаш дукха хиларах. Ший мехка цо халача хьалашка нийсбеннача наха новкъостал ду, каст-каста из хул герга истол дӀахьоча дакъа лоацаш, семинараш дӀахьош, уж ювзаенна я ший ханарча йиӀигий хьашташ довзара, уж кхоачашдара долча дешашца.

Кхы кӀезигагӀа хьинар долаш къахьегаш яц из Магасе а. Цо ший ха дӀахьу дешара тӀехьа, ший мукъа ха йолча хана а, де хӀама кораду.

Наджгоанцхой бутт чакхбоалаш, уж шоай курсе багӀарашца цхьана «Зизан цӀай» оттаде лаьрхӀа ба. Студенташ гуллу хозача моттиге, масала кафе, цар кийчъю Инде шоаш кийчъеча кепара из моттиг. Къамаьла юкъе долалу ловзар, халхар, шоай къаман гӀирс – сари тӀа а йийхе.

Белгалдаккха деза, Инде бахархой массайолча хана раьза ба моттигерча гӀалгӀай йиӀигашта. Лоацца аьлча, лоаман мехкарий раьза хилча, цар гӀад а бахе уж шоай мугӀарашка дӀаэц, тайп-тайпара хӀамаш хьае Ӏомабу уж.

Приянши Сони белгалдаьча беса, кхалнаха лоархӀаме дакъа дӀалоац вахара ерригача оагӀонашка. Уж ба кхетам луш, хьалхале лелаераш, предпринимателаш, активисташ. Укх дунен тӀа шоашта ховш дар юкъедоаккхаш хиларца, цар йохаю харцо, дӀадоах хьалхашка нийслуш дола кхоачамбоацараш, уж цӀенна а, юкъарлонна а, наха а дола новкъостал деш хул.

Инде йиӀигий ди долаш къаьстта, тхона лов уж ма хулла дика дегӀабоагӀаш хилар, еррига халонаш царех дӀакъастар. ХӀара дено ираз дахьалда шоана, юкъарлон оагӀув хилба шух.