«Теремок» яхача берий беша багӀача кагийбарий дика таро хилар профессиональни говзал йола кхоллам шоай бӏаргашца го. Цу тайпара дӀахьоча кхетаченаша сомабоаккх берий ашарашцара, халхарашцара безам, цар хьакхолл хозача хӏаманцара чам, цунца цхьана артист хилара а чам тӀабода»,  - аьлар «Сердало» газетага из болх вӀашагӀбеллараша.

Кхетаче хоза а сакъердаме а яр. Программа лаьрххӀа зӀамагӀчарна оттаяьяр, царна кхолламий дуне довзийта ловш.

Халкъа пандарий ансамбло дика ашараш лекхар. Бераш боккхача безамца хьожаш дар ашарий гӀирсашка, хӀара йиш дӀа мел локхача хана, тӀехьа тӀоараш детташ. Студенташ-халхарчаша зӀамигбараш цецбаьхар шоай дегӀа маьженаш ловзае харца, бераш боккхача безамца царна тӀехьахьожаш дар.

Хьаьший шоаш сцена тӀа баьнна Ӏацар, цар бераш а юкъедоахар цу кхоллама хьала, уж сакъердамах, хьинарах хьалдузаш.

Паччахьалкхен кхолламий колледжа Шолжерча «Теремок» яхача берий беша гойта концерта программах бокъонца дола цӀай хилар. Къонача артисташа зале тамашийна салоӏам бахьа хьал оттадир. Программан хӀара номер наьха самукъадоаккхаш яр.

Хоза кийчдаь цӀайна гӀирсаш,халкъа пандараш, хьалхарча миноташка денз, берий терко тӀаозаш дар.

Студенташа гойтар шоаш дика кийчо яь хилар, говзал, профессионализм хилар. Царна хайра ма дарра бераш цу цӀайна хьалага даха.

Кхетаче чакхйоалаш, берий беша кулгалхоша баркал аьлар къонача артисташта, цар иштта берий дог гӏоздаккхарах, керда кхоллама кхетаченаш хиларга кхы а сатувсилга дитар берашта.

Ашарий, халхарий цӀай дӀадахьарах; деша даха ха йоацача берий дегашка кӀоаргга лар йитар. Артисташта хайра, эггара чӀоагӀагӀа хӀама хоалуш дола зӀамига бераш раьза хургдолаш, концерта программа дӀаяхьа.

БоккхагӀчар белгалдора зӀамига бераш профессиональни говзала дуненга дахар лоархӀаме хилар.

Из кхетаче берий бешá, колледжá юкъе доккха доттагӀал хилар гойташ яр, шинна а оагӀоно лерхӀ цхьана культуран проекташ дӀаяхьа.