Судахой низ бола тоаба
ГӏалгӀайчен судо болх бу 100 шу да
Массахана нах тӀакхувш хиннаб нийсхонна. Из бахьан долаш, революцеш яьй, паччахьа ханашка а нийсхон тӀехьа доал дара хьал кегалуш хиннад. Цхьаболча наха хеталуш хила тарлу, бокъонаш лораяра даькъ тӀара болх тешшаме хургболаш деш дар, массайолча ханара иштта хила дезар да, аьнна, бакъда уж бокъонаш чӀоагӀъяра хьалха дукха къахьийгад цу тайпара паччахьалкхен а юкъарлон а бокъонаш оттаргйолаш.
Укх деношка вай республике дездир ши цӀай - ГӏалгӀайчен суда балха 100-шу дизар, ГӏалгӀай Республикан Лакхехьарча суда 30 шу дизар.
ГӏалгӀай халкъа вахара дӀаяхача ханаша хьагойт, дукха халонаш нийсъенна хилар. Бакъда цунга хьежжа доацаш, цу халонашта духьалъэттар къам. Эггара халагӀча хана, вайна хьалхалаьттараша шоай низ ураоттабаь вахар Ӏодиллар, тахан вай доаккхал ду цох.
Вахара дукъ,1924 шера хьадоладенна мел дар дӀалаьрхӀача, нийсде йиш я тӀема сангарашца - цхьан халонгара кхыча халонга кхоачаш, баха бийзаб гӀалгӀай. Уж ханаш лайнараша яхачох, царна хийла хеталора из чоалхане вахара хьал вӀалла а кхоачалургдац.
Советий Ӏаьдал дӀадаьнначул тӀехьагӀа эттача кердача ханашка, хӀара сага бокъонаш лораеча наха, балха тӀа болча наха духьале еш хинна террористически акт тахка езаш а цунна духьала йоагӀаш йола кхел е езаш а хилар лакхехьара суд. Из тахан а республике цхьоагӀонна, нийсхонна овла ба.
Мехка Кулгалхочо Келаматанаькъан Махьмуд-Ӏаьлас белгала ма дарра, тахан вайна гуш да республике суда болх чӀоагӀа латташ хилар. Цо яхачох, ГӏалгӀай Республикан Кулгалхочун администраце, паччахьалкхен-бокъоний керттерча урхаллено, Ӏаьдала болхлой, моттигерча доал деча даькъ тӀа къахьегаш барий, шоай болх бокъонаша дӀадеххача беса дӀабахьа безача болхлой профессиональни боарам лакхбара тӀехьа дика къахьийгад.
Макшарипа Махьмуд-Ӏаьлас «ГӏалгӀай паччахьалкхен 100 шу дизара» майдилг елар дукхача шерашка бокъонаш лораяра даькъ тӀа къахьегаш хьабоагӀача наха.
Цул совгӀа, суда балха ди дӀахьош «ГӏалгӀай Республикан цӏихеза юрист» яха цӀи елар кхаь судхочоа.
Суда болхлой даькъала бувцаш, царна ловца баккха лов. Могаш, маьрша, даим российски бокъонаша дӀадехачоа тӀехьа долаш, Россе гражданий бокъонаш лораеш дахалда шо.
