Бекарга бетта 5-ча денгара 12-ча денга кхаччалца дӏахьоргба болам укх шера. Бекарга бетта 7-гӏа ди дерригача дунен унахцӏенон Ди лоархӏаш да, цунца бувзам болаш да из гӏулакх. Мехкарча тайп-тайпарча оагӏонашка, моттигашка гӏолла тӏабехаш ба бахархой из дика гӏулакх хьаллаца. Интернете гӏолла кхайкарал деш хоам ба из тахан. 

lӏgazn.ru/10000 дӏачӏоагӏбенначул тӏехьагӏа миллион совгӏа долча адамах латтача тоабан юкъе хургва хӏара мехкахо. Белгалде деза, тахан наркоманена, корта бохабеча малара, гӏаьле увзара духьала вай мехка ма могга къовсам лоаттабелга. Иштта болх лоаттабу текха хилара духьала, дегӏа зе деш бола кхача баара духьала, воча оамалашца. Волавалар, дегӏ хьоадеш хилар чӏоагӏа лоархӏаме долга белгалдеш хьабаьхкаб вай даьй. Дийна саг кадай, хьинаре, хайна ца вагӏаш, вахар дӏахьош хила веза!  Деш хӏама доацаш вахара ха дӏаяхьар цхьа гӏод, бала боацаш дусаргдац яьхад немций байтанча Гёте Иогана. Хӏаьта тахана-м чӏоагӏа доагӏаш дешаш да уж…Интеренета оагӏонашка гӏолла тахан гу вайна Китаерча урамашка; ӏуйран, сайран арабоалаш; гимнастика еш латта нах. Ма чӏоагӏа масал эца дезаш хӏама да-кх из!

Иштта деррига адам арадаьнна шоай дегӏамашта доал деш, унахцӏенон хьал лорадеш хилар ураэтта тӏоараш тоха дезаш хӏама да! Из дукха хана денз хьадоагӏаш ӏадат да, хӏаране раьза волаш хьаллоацаш. Дуккхача мехкаша тахан хьаллаьцад из беркате гӏулакх. Хӏаьта вай мехка-м цхьа тамашийна хургдар, ха яха е къона саг араваьнна, массанена гуча моттиге зарядка е оттар. Бакъда, ше цхьаь е тоабанца гӏа боаккхаш, ший дегӏ сомадоаккхаш хилар цхьаннена а тамашийна хета йиш йолаш хӏама дац. Вай мехка къаьстта дукха я из гӏулакх дӏадахьа, волавала моттигаш. Спорт, физически культура хьаллацара тӏехьа боккха болх ба вай мехка боаржабеш.

«Къаьстта йоккха терко лоаттае еза спортацарча бувзама бераша, кхувш латтараша. Иштта дола хӏама дегӏаца бера хана чӏоагӏлу, къаьстта цу хана дезаденна, дегӏаца чӏоагӏденнар воккха хилча а леладу сага. Спорт яхар лоархӏаме оагӏув ба хӏаране вахаре, из массахана аьттонга бода никъ ба»,- аьлар ший къамаьла юкъе цхьан кхетаче Россе Президента Путин Владимира. Из гӏулакх берашта, къонабарашта, иштта боккхагӏчарна юкъе доаржаде, мерзде гӏерташ къахьег вай республике. Хӏара юрта, шахьарашка я ФОКаш, спорта лаьрхӏа доазош. Офисашка, дешара моттигашка дӏаьха сахьаташ дӏакхухьаш хайша багӏарашта арабаьнна болабала, тхьайса латта дегӏ сомадаккха шортта моттигаш я мехка. Бекарга бетта дӏахьоргбола болам хьаллаца аравала веза вайх хӏаравар.

Ший дегӏа уйла еш волча сага кхетаду из мела эшаш хӏама да! Тахан Наьсарерча ӏама гонахьара доазув тоадеш, шердеш, гӏашлой наькъаш дохкаш боахк мехка. Ара моллагӏа хаоттам латте а, паргӏатта волавала аьттув ба хӏаране. 10 000 эзар совгӏа гӏа баккхара меттал 50 000 эзар совгӏа гӏа баккха йиш йолаш ва-кх хьо паргӏатта, хьайна цхьаннена сагота хете, хьайца хьай новкъост араваьккха. Вай мехкарча массайолча шахьарашка: Магасе, Магӏалбике, Шолжа-Шахьаре, Илдарха-Гӏалий тӏа а йолаш я иштта волавала моттигаш. Ший дегӏа хьалага хьежжа хьовза веза саг. Хӏаране дика кхетаду шийна зене, пайда беш малагӏа хӏама хургда. Геттара дика да машинашта гаьнагӏа хьо гӏа боаккхаш хуле, цар газашца садаха ца дезаш. Уйла ел, беро хьалхара гӏа баьккхача, мел чӏоагӏа гӏадбахе хул цӏагӏа мел бола нах.

Массане сатувсаш, лорадеш дола хӏама хул-кх из бер мел долча цӏагӏа. Цу гӏулакхо а хьагойт вайна из мела доккха дика да! Тахан хьаькъале, вахара, дегӏа уйла еш хила деза вай. Ахкан хана мехкарча лоаман моттигашка гӏолла, гобоахаш хийла пенсе баха, ха яха нах гу вайна, гӏаж лувзаш гӏа боахаш лелаш. Вай теркалду-кх иштта волча сага букъ мел нийса, юкъ мел йиткъа я. Цхьаволча къонача сага дегӏал хозагӏа хул цар дегӏ, доал дендаь. Спорт яхар фуд кхетадерашта дика хов, вувхьаш садоахаш, кхо гӏа баьккхача салоӏаш латта везаш хургвоацаш дегӏ хьоадеш, доладолийташ хила везилга. Вай даьй массахана цхьацца хӏама хьадеш, кадай, хьинаре болаш хьабаьхкаб, цудухьа царна юкъе кӏезига хиннаб китала баха, тенна, букъ тӏабаьнна нах. Из деррига теркалдергда оаш къаьнарча сурташка хьежача.

Цхьа саг гургвац шоана дегӏ олладенна, вайна юкъе оалача беса, тай техача санна юкъ йолаш ба берригаш. Лоархӏамеча кхетаче шоаш тӏехьадусаш санна гӏа кадай боаккхаш долале деза вай дерригаш. Шорттига, мекъо гӏа боаккхаш волаваларо дегӏа пайда биц, низ боабар мара. Массахана ховш хила деза шо; могаш, кадай хила къахьега дезилга. Бера хана денз, доаржаде деза хӏама да из! Хӏара дезале, балха тӏа, дешача моттигашка хьаллаца из гӏулакх! Спорт вай вахара лоархӏаме оагӏув ба, спорто хозагӏа, сийрдагӏа ергья вай юхь а, дегӏ - кадайгӏа, низ болашагӏа!