Сага гӀо де оттар
ЦӀий дӀачутелара гӀулакх вай мехка дикка даржаш латт
ХӀара мехка, къаман хьалхашка латта керттера декхар да бахархой вахар лорадар. Эггара керте отт цу наькъ тӀа унахцӀенон хьал. ХӀара хӀаман тӀахьожам лоаттабе вӀаштӀехьадалац вай, бакъда, моллагӀа дагадоаца хатар ийккхача, унахошта Даьла духьа цӀий дала нах дукха хул вай къаман.
Иштта, цхьаннегара цӀий кхычунна дӀадала йиш йолаш Дала вай хьакхоллар хам баь варгвоацаш да! Из иштта ца хилча, мел хала хургдар аьнна уйла е эттача, уйла яь варгвоацаш да. КӀалхара ца доаккхалуш ма дукха адам кхалхаргдар вайна юкъера.
Дукха хатараш да наькъашка хулараш, ГИБДД болхлошка ладийгӀача, цхьаволча сага вахар хадаш нийслу, цхьабараш лозабийя, дийна бус. ХӀаьта цу миноте эггара чӀоагӀагӀа эшар цӀий хул. ЦӀий теха ханнахьа новкъостал даро доккхача хатарех доах вай хийла. Цудухьа, тахан цӀий дӀачутелаш бола нах лорашта, унахошта боарам боаца гӀо деш ба.
Теркалде деза, из никъ лелабе а хеттача тайпара атта доацилга. ЦӀий дӀачутелача республикерча станце дӀахьор боккха болх ба цу оагӀонца, цига кулгалдер я Гаркхой Диана. ЦӀий дӀачудала венача сага унахцӀено, цхьан хана текха лазараш, деррига хоатт лораша.
Из чӀоагӀа лоархӀаме да! ЦӀий кийчдеча оагӀон кулгал деча Гаьгенаькъан Мадинас тӀахьожам беш дӀаболабу чоалхане болх. ЦӀийх мел йоалла хӀама малагӀча хьале я тохкаш, къоастам беш болх бу цига; цул тӀехьагӀа, гепатит В, С, ВИЧ, сифилис яха лазараш цӀийца дий хьожаш чакхбоал.
Эшаш мел йоаца хӀама дӀакъоастаяь, цӀендаь, кийчде деза цӀий унахочунна тоха. ЦӀий талхаргдоацаш, боаггӀача боараме хургдолаш, къахьега деза цига. ЦӀий дӀачудала венача сага эггара хьалха ший унахцӀенон хьал довз, ший дегӀо фу йоах хов, тӀаккха ший унахцӀено лораяр а деций доккха хӀама?!
ХӀара денна тоалуш латт вайцига из гӀулакх, Даьла къахетамца. Дуккхача шерашка денз, цӀий дӀачутелаш хьабоагӀаш дукха ба вайна юкъе. ЦӀаккха а хам баь варгвац цу хӀаман, из гӀулакх дӀахьош боагӀача лорий. Массахана могаш, маьрша бахалба уж нах!
