ТӀема операцен юкъе лозабаьча бӀухой цӀеношка «Хьаькъал дола цӀа» яха гӀирсаш оттадир укх деношка вайцига. Магасерча квартире, ГӀажарий-Юртарча цӀагӀа из болх дӀахьош хилар бӀухоех дог лазараш. «Даьхен Лорбой» яхача ганза кулгал деча Оздой Муслима белгалдир, тӀема операцен доакъашхошта мел эшача хӀаманга хьожаш хилар, шоай лоархӀаме декхар да, аьнна. Халача хьале эттача Хазанаькъан Адама ког лозабир тӀем тӀа. Мел хьажарах, дӀабаккха безаш хилар из. Лозадаьча кулгага болх байта гӀерташ дукха дарба дир Вишневски А. А. цӀерах йолча дарбанчен лораша. Дикка доал деш, хьажа везаш унахо ва из тахан. ХӀаьта чӀоагӀа гӀо деш, гӀирсаш да цун цӀагӀа оттадаьраш. «Хьаькъал дола» колонка, лувжаш доаца кӀувсилгаш, робот-пылесос, «хьаькъал дола» розеткаш. Адама гӀулакхага хьожаш, цун терко еш хиннаб филиала болхлой. Миллион сомах латта сертификат делар цунна хьалха, кога латта протез тоаергйолаш. ГӀо эшар теркалвеш хилча, массане дегашта тоам хул.

Нийсача, бакъдолча хӀаман тӀехьа латташ хьавенав тха исторен турпалхо. Ший декхараш цо бехктокхаме чакхдоахаш хиларах, ефрейтора декхараш тӀадаьхкад цунна тӀем тӀа. Теркалде деза, из тайпара декхараш виззача бӀухочунна мара тӀадехкаш доацилга.

Гергиевски ЖӀарг делар цунна иштта белгалвоалаш, Даьхенах дог лазаш латтарах.

БӀарахой Ӏийсай цӀагӀа бесаш къестадеш бола къамаьл дувца гӀирс, «хьаькъал дола колонк», дешаш йола машин, смартфонаца бувзам бола сахьат оттадир филиала болхлоша. ТӀема операци хӀетта йолаеннача хана, дукха халонаш такха езаш хилар из. Командир кӀалхарвоаккхаш, шаккха бӀарг байна висар из. Массехк ди даьлча хайра цунна, ше де доацаш байнарашта юкъе дӀаязваьлга, ший цӀагӀарча нахага Денала орден дӀалуш йолга. ТӀема аренашка бӀухошта масал долаш, ший къамах хоза цӀи йоаккхийташ, лакха майрал, турпалал гойташ лаьттав из. МоастагӀчун 13 тӀема машин йохаяьй цо, моастагӀчунга деррига дӀадувцаш лийнна зуламхо гучаваьккха, цул тӀехьагӀа из есарал воалавьв, иштта кӀалхарваьккхав лозаваь хинна 30 бӀухо.

Йоагаш латтача танка чура новкъостий арабоахаш, вӀалла а уйла йинзар цо ший дегӀа. Шозза еннай цунна Денала орден, шозза вир цох Россе турпал. Ший цӀен-наьнаца, дезалца, ГӀажарий-Юрта вахара денош дӀахо дӀахьош ва из тахан. Хин хьал, тока хьал, розеткаш, иштта кхыдараш теркалде йиш я цун тахан интернете гӀолла. Къамаьл дувцаш дола ногӀараш, тайп-тайпарча хӀамай индикатораш я цун кухне. «Робин» яха «хьаькъал дола гӀаж» дӀаелар цунна ганза кулгалхочо, ахкан хьалхарча бетта. ГӀалгӀай къаман денал долча къонгаша массахана лакха лоаттадаьд Даьхен сий! Могаш, маьрша болаш, иразе бахалба уж дӀахо! Дала атта долда цар вахарера гӀулакхаш!