Йоккхача, дика вӀашагӀъеллача кхетачене дакъа лоацаш хилар студенташ, ишколай дешархой, хьехархой, журналисташ, юкъарча балха викалаш, йоазонхой, поэта гаргара нах.

Йоккха доклад йийшар Шовхала Азмат-Гире кхоллама наькъах лаьца, ГӏалгӀай Республикан йоазонхой Союза кулгалхочо Ноакастхой Хаважа.

Иштта ше къамаьл деш, ГӏалгӀайчен халкъа оазархочо Дидиганаькъан Раисас, цун новкъосташа керттера терко тӀаяхийтар Шовхала Азмат-Гире дӀабихьача кхоллама наькъа, цо боккхача безамца кхайкабеш, бекабеш лелабаь хиларах гӀалгӀай мотт, из лорабеш, безаш хиннарех цаӀ вар из.

Хӏара дешаца хоалуш дар, вайна хьалхадоаккхаш хилар цун поэтически тӀехьале мах болаш йолга, из Ӏомаяра терко тӀайохийташ хила везилга.

Цун дукхача поэтически кхолламо хоза а чӀоагӀа а дувц Даьхенна гӀулакх де дезарах, бокъонца болча вай заман турпалхой дикалах, валлалца уж гӀулакхаш дӀахьош хила везарах.

Шоаш цхьана цунца дӀабихьача балхах, литературан бехктокхаме моттигаш дагаухаш, новкъосташа, из дика вовзаш хиннараша цун вахарах, оамалах лаьца дийцар.

Из вай заман наггахьа мара гуш йоацача дийшача сага кеп йолаш вар, ше хоаставеш хилар дезаш а вацар, совгӀаташ а цунна башха эшаш дацар, е балха тӀехь цӀи ялар а дезаш вацар. МоллагӀа чоалхане хьал эттача, деналах вохаш а вацар, бокъонца вола къонах вар. Цхьа белггала йола ха яьлча, цунна цох лаьца беламе алар а корадора, из хӏама бегашта а даьккхе дӏадоаккхаш.

Угурчанаькъан Азмат-Гири ший заман саг вар, цун новкъостий санна, дукха халонаш лайна, хӀаьта а нийсхонга сатувсар доа ца деш хьавоагӀар из.

Хӏара денна болх беш дешаца, кхыча къамий культурай мах бараш довзаш, цу тӀехьа йоккха ганз шийца йолаш, цо цар йоазошта таржам дора из йоазув гӀалгӀай меттала доаккхаш, вай меттала дешаш барашта цар метта кӏоаргал, литературан мах бараш довзийташ.

Уж санна йола Шовхала Азмат-Гире вахара моттигаш ювцаш, из селхана мара ца хилча санна хеташ, укхаза дийцар цун вахаре карагӏдаьннарех а.

Цо болх бир радио, бокъонаш лораяра органашка, газеташка, журналашка.

Из дагавоха аьнна гулбеннараша иштта дийцар, из хӀара сага дикадар хилча дезаш хиларах. Цо моллагӀа долча хӀаман мах оттабеш хилча, цу юкъера дикагӀдар белгалдора, из санна долча хьало сага таро лу дӀахо дикадар де, низ чубол вахара хьалаш тоадара.

Дезаш вацар Азмат-Гири баьде бесаш, кхыча нахах дувцача хана, сагагара даьнна гӀалат дужаде хьожар. Нагахьа санна из сурташ дехкаш хиннаваларе, уж хургдар маьлха зӏанарех къегаш.

Цига цу дийнахьа хиннача гаргарча наха, из вовзараша, везараша баркал аьлар из кхетаче вӏашагӏъелларашта - вай республикан Къаман библиотекан болхлошта. Цар дика къахьийгар из наьха дегашка юсаргйолаш.

Угурчанаькъан Шовхала Азмат-Гири ший вахаре даим сатувсаш вар, хьамсара мохк дика дегӀабоагӀаш хиларга. Цун кхоллам тахан къаман юкъе бахаш ба, хӀаьта цун вахар масал хинна дӀаэттар, боарам боацаш ший хьамсара ГӏалгӀайче езача виӀий безам санна.