Кинематографе къаьга сердал
ГӏалгӀайче ший болх дӀаболабу ХӀ-ча «Дошо гӀала» яхача кинофестивала
ГӏалгӀайче ший болх дӀаболабеш я ХӀ-ча Халкъашта юкъера «Дошо гӀала» яха фестиваль. Из лаьрххӀа хьакхайкадаьд ГӏалгӀайчен культуран, туризма Министерствос, иштта Россе кинематографистий Союзо. Фестиваль я Къилбаседа Кавказа шера йола йоккха белгало, из дӀахьоргья лайчилла бетта 20-ча денга кхаччалца. Хьажархошта кийчъяьй дика программа. Республикан ийс майдан тӀа гойтаргда дунен тайп-тайпарча моттигашкарча кинематографистий балхаш.
«Сийлахь-боккхача Даьймехка тӀема котало яьккха 80 шу дизача шера дӀахьош хиларах, фестивало лаьрххӀа йола терко лоаттаергья патриотически оагӀонна. Ийс даькъах латтача яхьан программе дакъа лацара дола дехараш хьаийдеш хилар карарча шера тов бетта 25-ча денгара ардара бетта 25-ча денга кхаччалца. Яхьан программа чудоагӀаш дар 2022 шерал хьалхагӀа доаца фильмаш. Карарча шера фестивала ший таронаш шеръеш, цу юкъебоалабир, Россера хинна а ца Ӏеш, СНГ мехкашкара,иштта БРИКС мехкашкара доакъашхой. Кхетаче дакъа лацара хьачуденнад 200 совгӀа дехар, дӀадахача шера уж дар 90», - аьлар «Сердало» газетага ГӏалгӀайчен культуран, туризма Министерстве.
Цу тайпара, Къилбаседа Кавказа дег чу юха а хьалсог кинематографе искусствон сердал. Халкъашта юкъера фестиваль «Дошо гӀала» дукха ха я къаьга культуран хьал хинна дӀаэтта, из я деррига кхоллама низаш вӀашагӀтохаш. Из йийлла моттиг я тайп-тайпарча мехкашкара баьхка кинематографисташ шоайла дагабалара, цу даькъ тӀарча балха говзал дӀа-юха эцара.
ГӏалгӀайчен кинокхетаче нийслу Ӏадаташ, кердадараш, классика, хьалхалаттараш, деррига дика мел дар вӏашагӏтохаш.
«Дошо гӀала» я юкъарча меттага, кинога гӀолла халкъашта юкъера бувзам чӀоагӀбеш. Фестивала программо хьагойт юкъера доазонаш хьаделла, цатоамаш дӀадаха искусствон карагӀдоалаш хилар, хьажархошта тайп-тайпарча культурай мах бараш гойташ .
ЧӏоагӀа лоархӀаме да Къилбаседа Кавказа кино даькъ тӀара центр ГӏалгӀайче тахан хилар. Фестивала таро лу зӀамига начӏал дегӏадоаладе, мехка таронаш йоаржае.
«Дошо гӀала» яха кинофестиваль - из дӀаболалучар, иштта шоаш дегӀабоагӀаш болча режиссёрий майда я, цар балхо таро лу шоашта карагӀдоалар дукхача наха гойта. Уж да – ретроспектива гойтамаш, лаьрххӀа йола программаш, цунца хьакхолл кинематографа болх, говзанча хьехамаш, лекцеш, иштта дика бовзаш болча киноговзанчаша шоай аргӀагӏа къонача ноахала дӀалу балха говзал.
«Дошо гӀала» духхьал фильмаш гойташ яц. Кинокхетачено хьакхолл кердадараш, шоайла бувзам, кхеташ хилар. Искусство эггара чӀоагӀагӀа нах вӀашагӀтоха, уж шоайла кхеташ хула, культуран даькъ тӀара мах бараш декъа майда я.
«Дошо гӀала» яха ХӀ-ча Халкъашта юкъера кинофестиваль хургья, кинематографе даькъ тӀа карагӀдаьннар гойташ, иштта ГӏалгӀайче, Россе культуран хьал дегӀадоаладеча ший керттера дакъа юкъедахьа кийча хилар дӀакхайкадеш.
