«Россе Президента юкъеяьккхача программаца эггара хьалха дакъа лоацаш ба вай мохк. «Юртара лор», «Юртара хьехархо» яхача цу оагӏонцарча программашка гӏолла дӏабихьача балхах дикка пайда баржилга зийнад вай тахан. Хӏаьта хӏанз из аьттув культуре къахьегарий а ба. Къона болхлой юрташка хьаухаш, пхе шера болх бе совцаргболаш, мел эшар чулаьца я из беркате программа», - аьлар вай мехкадас Келаматанаькъан Махьмуд-Ӏаьлас.

Программан хӏара доакъашхочо цхьа миллион сом ахча эцаргда. Юрташкара культуран оагӏонцара хьал тоадара тӏехьа юкъеяьккха программа хьаллоацаш болх дӏахохьоргба доакъашхоша. Котбаьнна Галай З., Мейренаькъан З. Алхастерча, Мужечарча культуран цӏеношка къахьегаш хургба диззача пхе шера.

Юрташкарча моттигашка шоай болх дика бовзаш, дӏахьош бола говзанчаш тӏаоза, аьнна, юкъедаьккхад из гӏулакх. Цу гӏулакхо дикка аттача доаккхаргда цигарча культуран цӏеной хьал.

Программан юкъе котбаьннарашка хьежаш керда наькъаш да. Вай Мехкадас тахан белгалду, мехкарча моттигашкара культуран оагӏонцара хьал тоадар эггара лоархӏамегӏа долча гӏулакхех долга. Цу оагӏонца дувзаденнараш меттадоаладара тӏехьа, ма могга къахьегаш латт вай мехка укх тӏехьарча шерашка.

2019-ча шера денз, «Культура» яхача къаман проектага гӏолла къахьегаш хьайоагӏа республика. Цу юкъа керда хьалдаьраш, тоадаьраш, доккхий хувцамаш юкъедихьараш 24 культуран цӏа да.

Бахархой аьттув ба тахан кхоллама вахаре шоай начӏал гойта, цхьацца хӏама доаржадеш хила. Таханарча дено дӏадеххача тайпара, уж моттигаш тоаеш, эшаш мел бола кхоачам, гӏирсаш лоаттаду культуран цӏеношка.

Культуран оагӏонцарча хувцамашта юкъе керттера моттиг дӏалоацаш я Магасе хьалъеш латта Хамхой Ахьмада цӏерах йола Паччахьалкхен филармони. Таханарча ханага хьежжа, ӏалашъяь хургья из гӏишло. Къонача тӏехьен, берий аьттув ба тахан шоай юрташкарча культуран цӏеношка къахьега, цхьацца пайдане йола говзал ӏомае. Россе Президента Путин Владимира 2025-ча шера наджгоанцхой бетта 1-ча дийнахьа юкъеяккхийтар «Юртара культуран оагӏонцара болхло» яха программа.

Цу оагӏонца къахьегараш зӏамигача шахьарашка, гаьна ядача юрташка тоъаш боацандаь, доаржадаь гӏулакх да из. Программан керттерча декхарех да, кхычахьара болхлой юрташка болх бе хьаухаргболаш, боаггӏача боараме кӏалхара хьал меттадоаладар.

Россе моттигашкара культурацара вахар лерттӏа тоаде, аьнна, баь соцам ба из. Культуре къахьегарий шоай говзал йоаржае аьттув ба тахан, хӏаьта шахьарашта гаьна ядача юрташка, йоккха йоацача шахьарашка бахача наьха цу оагӏонцара хьал дикка меттадоагӏаргда.