«Кхерамзлен ишкол» яхача яхьашка котбаьннарий цӀераш яьхар
ГӀалгӀай мехка дӀайихьар моттигера Ерригроссийски берий-ондаргий юкъарча болама «Кхерамзлен ишкол» яха яхьаш.
Цига дакъа лоацаш яр мехка дикагӀа йола тоабаш, хьалха моттигерча даькъ тӀа дӀайихьача яхьашка белгалъяьлар уж, шоашта хьалхашка оттадаь деррига декхараш кхоачашдаь хиларах, цудухьа чемпиона цӀи лелаяра йола бокъо яр цар. Яхьаш дӀаяхьар хьаллаьцар ГӀалгӀай Республике гӀолла йолча Россе МЧС Керттерча урхаллено, республика дешареи Ӏилмани Министерствос, уж вӀашагӀйохкаш новкъостал дир МагӀалбика кхален берий-ондаргий туризма, мехктохкама Центро.
Республикан яхьаш дӀахьош, дешархоша тайп-тайпарча даькъош тӀа шоашта ховш дараш гойтар, масала, Ӏалама чоалханерча хьалашка нийсвелча, хьалхарча аргӀагӀа де дезар фуд; хьун даькъ тӀа кӀалхарваккхара болх мишта дӀабахьа беза; тӀема, цӀи ялара хьал дӀадаккхар, иштта кхы дуккхадараш а», - аьлар «Сердало» газетага МагӀалбика кхален берий-ондаргий туризма, мехктохкама ЦӀен кулгалхочо Дзейтанаькъан Беслана.
Тхоца къамаьл даьчо яхачох, тӀехьара тӀа кхетам балара йолча ГӀалгӀайчен ишколе уж мо дола наькъаш Ӏомаду, цар таро лу берашта цӀаьхха чоалханера хьал эттача моттигага кийча хила.
Мехкара яхьаш массаза санна дӀахьу МагӀалбика кхале, тӀема сийлен шахьаре МагӀалбике, Ӏалама хьалашка цу тайпара болх дика дӀабахьа таро хул.
«Кхерамзлен ишкола» вӀашагӀъелларашта шоашкара новкъостал дир «Тоаркхо» яхача лахара-кӀалхарваккхара тоабо, ПСЧ-1 цӀера-кӀалхарваккхара болхлоша. Цо таро хилийтар, лакха кийчо йолаш, хьалхашка оттадаь хинна декхараш кхоачашде.
Яхьаш дӀайихьар массехк даькъа йийкъа. Хьалхарча даькъе яр цӀи ялара оагӀув.
Доакъашхошта хьалхашка оттадаь хинна декхараш чоалхане дар: цӀи йоаечун гӀирс тӀа а бийха, вада везаш вар из, цул тӀехьагӀа лаьрххӀа бола муш дӀа а бийхка, новкъостал эшаш вар кӀалхарваккха везаш вар, хий уха марш хьа а яьста, из турбах дӀатасса езаш а вар.
ШоллагӀча даькъе лаьттар кхыдола декхар дар. Цу даькъ тӀа лахара-кӀалхарваккхара болх дӀабахьа безаш бар. Укхаза нах кӀалхарбаха безаш бар, хиво Ӏохьоргвоаца гом чу а тесса, из хьал а ваьккха, цунна эшаш дола новкъостал де дезар.
КхоалагӀча даькъе лорий новкъостал де дезар. Доакъашхоша хьагойта дезаш дар, лорий балха даькъ тӀа шоашта фу карагӀдоал, из дар цӀий дистар, хьийдда цӀий соцадар, дега хьал хар.
Яхьашка таро хилар, шоашта фу карагӀдоал ха, чоалханерча хьале мишта хила веза Ӏомаде.
«Кхерамзлен ишкол» оалача яхьашка хьалхара моттигаш яьхар СоагӀапчарча №30 йолча ишкола йоккхагӀа йолча тоабо, Наьсарен кхален гимназе, №3 йолча Шолжа-Шахьара юкъерча ишколо.
ЗӀамагӀа йолча тоабашта юкъе яр Инаркъера №12 йола ишкол, МагӀалбикера №2 йола юкъера ишкол.
Котбаьннараша хьагойтар, кхерамзленна Ӏалашо ярах шоаш дика кхеташ хилар, чоалхане хьал этта моттиг нийслойя, фу деза дика Ӏомадаь шоаш хилар.
ХӀанз царна хьалхашка латта декхар да, Къилбаседа ХӀирий мехка, аьтинга бетта 22-27 деношка кхаччалца, дӀахьоргйолча «Кхерамзлен ишкола» бе-беча моттигашта юкъерча яхьашка вай республикан сий лорадар.
Карарча хана, бераша тренировкаш дӀайолаяьй. Уж дӀахьош я СоагӀапча уллача хьун даькъ тӀа, хий долча моттиге, цӀи яларга кечам беча даькъ тӀа. Дешархой кийча ба, хургйолча яхьашка, дикача оагӀорахьара шоаш дӀагойта.
