«Гойтаме баьхкарашта довзаргда, тӀема денош мишта хиннад хьокхаш суртанчаша-бӀухошка даь балхаш. Цига го йиш я Сундуков М.А., Жерештиев А.А., Третьяков М.Н., Половицке В.К., иштта кхыбарий тӀема бирсача деношка гӀолла чакхдаьнна сурташ»,- дийцар «Сердалога» мехкарча Паччахьалкхен болхлоша.

Сурташ тӀара хӀара хӀама боккхача, къизача тӀема шераш дагадохийташ, бокъонца тӀема аренашка даьллар хьахьокхаш да.

Таханара маьрша сигале бахьан долаш, фашиста наькъаш тедаш, лира тохаш, вай лаьтташкара цун лар хоадаеш, лаьттарий бӀаргаша зийнар, дегашка даьллар да сурташка гуш дар.

Дукха хӀама духьалъоттийташ болх ба из хӀара сага. Шоай дегашкара кхерам, сатем бовр, деррига кегадалар да цар хьахьекхар.

ТӀема истори довзийташ дола къонача суртанчий балхаш лакхача маьхе да. Тахан кхувш латтарашта иштта дола сурташ довзар лоархӀаме да, Даьхен истори довзара оагӀонга диллача. Суртанчаша цу халача, бирсача деношта юкъе даьча балхаша белгалду, тӀема истори диц цадалийтар мел лоархӀаме да.

Къаьстта терко е еза ишттача гойтама къонабараша. Вай массане селхане, вай Даьхен денош да уж! Сурташка гӀолла вайга хьакхачийта хьежаб уж; фашист вай лаьтташка чугӀортарах дехкевоаккхаш,

Гитлер яхача бӀехача адамо лаьрхӀар дохадеш, шоаш мел къахьийгад. Сийлахь-боккхача Даьймехка тӀема истори ма дарра довза деза тӀехьа тӀабоагӀарашта.

Гойтам вӀашагӀбеллараша белгалдечох, къонача тӀехьенна боккха пайда беш да иштта гӀулакх доаржадар. Фашиста духьала латташ вахар хаьдарий истори, цар тӀема бирса никъ бовза аьттув ба цун.

ХьатӀабоагӀача бетта 26-ча денга кхаччалца, латтаргба гойтам. ТӀема шерашкара истори бӀаргаго аьттув ба бахархой, шоай дезалашца гойтаме дакъа лаьца.