Тӏема декхар
СВО доакъашхочун Дзараханаькъан Мухьмада цӏерах «Денала парта» хьайийллар
«Денала парта» яхар, тӏема операце доакъашхоша гойта денал лархӏарал совгӏа, Даьхен истори лорадар да. Шоашта тӏадехка тӏема декхараш дизза кхоачашдеш, лакха майрал гойташ, латт тахан тӏема аренашка российски бӏухой. Вай дегаша цӏаккха бицбе йиш яц деналах бизза бола къаман къонгаш.
2018-ча шера йоаржаяьча дешара проекта керттера декхар: халача моттигашка белгала болаш, шоай къаман дика цӏи йоаккхийташ латтача къонгий цӏераш дӏайовзийтар. Цар тӏема никъ ма барра бовзийт дешархошта, студенташта. Тахан кхувш латтача къонача тӏехьен бовза беза Даьхен турпалаш, масал эца мегаргдолча къонгий сий деш баха беза.
Къилбаседа Кавказа доагора-энергетически колледже хьайийллар Дзараханаькъан Вахий Мухьмада хетаяь «Турпала парта». Колледже деша ваьгӏача, Украине вахар хаьдача Мухьмада гойтача майралах, цун тӏема деноех хов хӏанз студенташта, хьехархошта, Дебе-Юртарча бахархошта.
Магӏалбике кхийна Мухьмад 30 шу долаш мара вацар, 2025-ча шера саькура бетта 15-ча дийнахьа моастагӏчун мина тӏа нийсбаларах вахар хаьдар цун, цунца хиннача берригача бӏухой.
Чӏоагӏа хала човнаш яр Мухьмада хиннараш, ворхӏ российски бӏухо аллийсар цу моттиге. Денала орден, «Дошо Седкъа» яха орден – «СВО Турпал» енна вар вай мехкахо.
