«Гулбеннарашта хьалхашка къамаьл деш хиннача МВД кулгалхочун декхараш кхоачашдеш волча полице полковник волча Козярский Алексейс, цун гӀонча волча полице полковника Маммаев Багомеда, Наьсарен кхалерча Россе ОМВД кулгал деча полице полковник волча Налганаькъан Ахьмада белгалдир, цу халача хана вахар хаьда милиционераш дуккхача Ӏаьдала болхлошта масал долга, цар цӀераш къаман вахаре массахана еза хургйолга. Мехкара машар, паргӀато лораеш лаьтта бизза къаман къонгаш ба уж», - дийцар «Сердалога» МВД болхлоша.

Дагалоаттама кхетаче, вахар хаьдача хӀара болхлочун цӀи яьккхар. Цар гойта майрал, денал, яхь йолаш шоай мохк, мехкара адам лорадеш латтар цӀаккха а дицде йиш ярех дац.

Кхелхача Ӏаьдала болхлой гаргарча наха ахчанца, кхачан тӀормигашца гӀо дир. 2009-ча шерара маьцхали бетта 17-гӀа ди вай къаман исторе Ӏаьржа, хала ди хинна дӀаэттар. Ӏуйран ийс сахьат даьлча, хӀама ийккха доккха хатар эттар Наьсаре. Дукхача наьха вахар хувцаш дола ди хилар цох. Наьсарерча РОВД коа Ӏуйран милиционераш нийсбенна дӀаэттача хана, цу ковна наӀараш йохаеш, лелхаш долча гӀирсех йизза «Газель» чулаьлла, из эккхийтар бӀехача зуламхочо. Эккхара низ 400 кийла тротилови низага кхоачаш хилар.

Яхь, денал доацача бӀехача зуламхоша вӀашагӀделла , цхьаккха адамал доаца хатар дар из. ОВД гӀишло, юхе латташ хинна квартираш йола цӀа дохадир цу хана. 25 деналах бизза хиннача къаман къонгий вахар хаьдар цу дийнахьа. ОВД 17 болхло Даьла кхеле дӀавийрзар, 130 сага тайп-тайпара човнаш йир, царна юкъера дуккхабараш тахан заӀапхой ба.

Цу берригача наьха цӀераш дагалоацаш, вай дерригаш гӀайгӀанга дугаш дола ди тахан. ГӀалгӀай къамо цӀаккха а йицъергьяц деналах бизза хиннача ший къонгий цӀераш. Массахана вай дегашка, къаман вахаре бахаргба уж, яхь йолаш хинна къонахий болаш.