Республикерча спортацарча программированех йолча Федераце вице-президент волча Налганаькъан Бориса Илеза «Сердалога» дийцар цу яхьашца дувзаденнарех, иштта толамех.

- Илез, малагӏа никъ вай кагирхошта хьабеллаш да тахан из гӏулакх?

- Спортсменашта шоай гӏулакх чӏоагӏде, тоаде аьттув луш да из; цул совгӏа, болх лаха, иштта кхыдараш кхоачашде йиш я.

- Дӏадахача шера вайцига эггара хьалха дӏайихьар «Алгоритмически программировани» яха чемпионат, хӏаьта укх шера кхыча оагӏонцара болх хьаллаца лерхӏ оаш. Сенца дувзаденна да из?

- Хьалхарча чемпионатага гӏолла, Ерригача Россе яхьашка дакъа лоацаргдараш хоржаш хилар тхо. Цу оагӏонга гӏолла лакха начӏал дараш гучабоахар оаха. Продуктови программировани йовза кагирхой вай мехка кӏезига бац, цудухьа из оагӏув хьаллаца лаьрхӏар оаха къонабарашта юкъе.

- «Исходный код - 100» яха спортацарча программированех йола чемпионат дӏайихьар Наьсаре, дукха ха йоацаш. Дувцал тхона цунца дувзаденнарех.

- Турнирах иштта цӏи тиллар ший бахьан долаш дар… Гӏалгӏай паччахьалкхен 100 шу дизара хетаяь кхетаче яр из. Кхетама хьал лакхдеш йола спорт вай кагирхошта юкъе йоаржаяр дар цига лоархӏаме хиннар. Белгалде деза, цу оагӏонца къахьегараш хӏара денна дукхагӏа хулаш латтилга Россе спортацарча программированех йолча Федераце гӏолла. Федеральни оагӏоно хьаллоацаш дӏахьош лоархӏаме гӏулакх да из тахан.

- Кхетама хьал гойташ йола яхьаш тахан мел яьржа я дешархошта юкъе?

- Дӏаяхача чемпионате кхетадир оаха, из гӏулакх дуккханешта дезаш долга. Беттал кӏезигагӏа йолча хана 33 тоаба вӏашагӏкхийтар ерригача кхалешкара. «Олимп» яхача лакха начӏал дола бераш деша дагӏача лицейца дӏахьош яр кхетаче.

- Малагӏа хӏама керте оттаду оаш?

- Гӏалгӏай паччахьалкхен 100 шу дизара хетаяь кхетаче дӏаяхьа безам болаш тха тоаба йола дукха ха яр. Ишколан вахаре спортацара программировани хоттар геттара дика хургда аьнна хийтар тхона.

- Иштта йола кхетаченаш кхы дӏакхахьа лерхӏий оаш?

- Спортацара яхьаш дӏаяхьара тӏагӏолла болх дӏахьош да тхо тахан… Мехкарча дикагӏа лоархӏача вузашка деша дӏахьожабе лерхӏ котало яьккхараш. Из гӏулакх пайда болаш чакхдаргда аьнна хет.

Лоаца биографи:

Налганаькъан Бориса Илез ваьв 1996-ча шера маьтсела бетта 20-ча дийнахьа Наьсаре.

2015-ча шергара 2018-ча шерга кхаччалца, Ерригача Россе паччахьалкхен университета юстице факультете дешаш хилар.

2019-ча шера Ростовера Хоамашцарча кхерамзленах, телекоммуникационни балхах йола бувзамах, информатиках йола колледж яьккхар. 2019-ча шергара 2021-ча шерга кхаччалца, Ерригача Россе паччахьалкхен юстице университета магистратуре дешаш хилар. Карарча хана Наьсарерча Тутайнаькъан Аьсета цӏерах йолча унахцӏенон оагӏонцарча колледже юкъарча-ӏилман оагӏонца дувзаденнарех вола хьехархо ва. 12 шу даьлча денз, наьна меттала байташ язъеш хьавоагӏа Илез, республикерча йоазонхой Союза доакъашхо ва.