Диззача шера болх дӀахьош, доал доацаш лела 30 циск кӀалхардаьккхар проекта тоабо, 100 совгӀа циск цӀендир. Дарба даьчул тӀехьагӀа, дӀахо меттада йӀайха, лерттӀа моттиг еза цискашта, цудухьа из Ӏалашйир цар. Эггара лоархӀамегӀдар да, иштта лелача цискашта уж дӀаэца, доал де саг лахар. ХӀаьта вай къаман нах массахана хиннаб, цискашца ший тайпара безам болаш. Къаьстта юрташка атта ков хилац, циск доацаш.

100 совгӀа доал доацаш лийнна циск дӀанийсде, царна фусам лаха аьттув баьлар, дика доаржадеш лелача тоабан. Семинараш, кхетаченаш дӀакхухьаш, Дала хьакхеллача цу мискача дийнаташца къахетаме хила везилга, царга хьажар боккха маьл болга хьалхадоахаш, хьабена боккха болх ба из. ЧӀоагӀа гӀадвугаш дар, лекцешка, цу тайпарча кхетаченашка дакъа лаца Магасера, ялх шергара 65 шерга кхоачаш, 2000 совгӀа бахархой гулбенна хилар. Цу дийнаташта доал дар мишта хила деза дийцар царга.

«РФ Конституце 114 статья юкъелоацаш, хьайбашца дика хила безилга белгалдеш, дӀахьош ба из беркате болх. ЗӀамига долча хана денз, хьалхадаха деза бера царца къахетаме, дика хила дезилга, из хӀара сага декхар долга», - белгалдир «Мурлой цӀа» яхача проекта хьалха латтача Оздой Абукара. Теркалде деза, 40 совгӀа циска 3D оагӀонга гӀолла протезаш увттае аьттув баьннилга. Даьла къахетамца, дийрза дӀадахад цискаш.

Теша лов, из беркате гӀулакх хьаллоацараш дуккха хургхиларах. ХӀара саг шийна тӀехьа хоза, сийрда лар йита хьажа веза. Тахан цу мискача дийнаташка хьожаш, царна дарба деш латта дезараш вай, адамаш, да! Дала вайна тӀадилла декхар да из!