Ноаношта хетадаь илли
Хоза цӏай дӏадихьар мехка
Наьна Денна хетадаь концерт хилар берий театре. Цига гулбелар СВО дакъашхой ноаной, истий, йижарий, хьехархой, цӏихеза къахьегамхой, иштта кхыбола мехкара кхалнах. Дега эггара хьамсарагӏа волча сага Денна хетадаь дола цӏай боча дар массане дегашта. Кхетаче дӏайолаеш, йистхилар Паччахьалкхенна хьалха латта Сластенин Владимир.
Вай мехкадаьгара, Келаматанаькъан Махьмуд-ӏаьлагара къамаьл дир гулбеннарашка хьакима. Нана хӏара сага вахаре мел лоархӏаме, мел боча хила езаш саг я белгалдир къамаьла юкъе. Деналца, къахьегамца, дега кӏаьдалца шоай декхараш кхоачашдеш; йӏовхал, безам боаржабеш латтача ноаношта; баркал кхайкадир мехка кулгалхочо: «Вахаре эггара хьалха ӏомадеш дола хӏамаш беро наьнагара хьаэцаш да, нана я массадолча хӏаман керте латтар, цудухьа цӏаккха а хам баь даргдац вай нана яхача деша.
Къаман эздий ӏадаташ, оамалаш, вӏаший гаргалолаш лелаяр а наьнагара ӏомадеш дола беркат да. Юххьанца наьнагара хьаийца сийдола гӏулакхаш тӏехьено тӏехьенга телаш дӏадолх, цар ӏомаву ваха, наха юкъе хоза гӏулакх леладе. Хӏара нана ший цӏен кхуврч лорабеш латт, цар йоаеш йола бийсаш, дезала тӏехьа яь гӏайгӏа цӏаккха а юхадийкха даргдоацаш хӏама да. Культуран гӏулакхех йолча Министерствонна хьалха латтача Лаьнанаькъан Залинас ший къамаьла юкъе теркалдир, нана яхача сага дегаца цхьаккха хӏама дусталургдоацилга.
«Наьна деналах, цун сатохарах дувца эттача, вӏалла а дийца варгвац. Из вайх хӏаране вахаре эггара лоархӏамегӏа йола саг я», - аьлар цо. Мехкарча берригача ноаношта баркал аьлар цо хьинарца, боарам боацача безамца шоай цӏен кхуврч лорабеш, хам баь варгвоаца йӏовхал йоаржаеш латтарах.
Хамхой Ахьмада цӏерах йолча Паччахьалкхен филармонерча артисташа наьнацарча безама хетадаь доккха концерт делар цига. ӏаьленаькъан ӏайна, Охценаькъан Роза, Овшанаькъан Зара, Бӏарахой Люба, Олиганаькъан Марем, Акхасаганаькъан Мовсар, Мусенаькъан Алина, Пхьугой Амир, иштта кхыбараш а бар ноаной дегаш хьаста сцена тӏа арабаьннараш. Къаьстта белгала яр «Дега оаз» яха тоаба. Наьна дог хьаьста йистхила ловш вар хӏаравар, гуш дар, наьна Ди хӏаранена хьамсара, гарга, боча долга.
Наьнацарча безамах дукха яздаьд вай байтанчаша, йоазонхоша. Мел дукха дийцадале а, дийца варгвоацаш да наьнацара хӏама! Къаьстта дог гӏоздаьнна бар ха яха ноаной. Вай массане хьаллаца, теркалде дезаш цӏай да из. Наьна дог хьаьста, могаш дола дикаш цунна лоаттадар – хӏара сага тӏалатта лоархӏаме декхар!
