Дог лазаш хилар
Донбассерча тӀема юкъе вахар хаьда бераш дагалаьцар мехка
Миллионаш россиянашта хала долаш да тахан Донбассе ВСУ низо бераш доадар. Вахар хаьдача берашта хетабаь болам дӀабихьар вай мехка берий бокъонех йолча викала Чахкенаькъан Заремас, Берий Юкъарча кхело хьаллоацаш. Тахан вайна юкъе доаца бераш дагалоацаш йола кхетаче яр вӀашагӀъеллар.
«Цхьаккха къахетам боацашя, доадаь бераш дагадох вайна хӀара шера цу дийнахьа. Берий вахар эггара дезагӀа долча хӀамаех долга, бера вахар хадарал чӀоагӀагӀа дега Ӏоткъам беш хӀама доацилга кхетаду вай тахан», - дийцар «Сердало» газетага Берий бокъонех болча оагӀонцарча Берий юкъарча кхела хьалха латтача ЦӀолой Ислама. Безаме, хоза вахар дуаш, дуненца дог ловзаш лела дезаш дола бераш да тахан доацараш. Дагалаьттар кхоачашде, шоай дегаш хьегаш хинначунца сакъердадала аьттув боацаш, вахар хаьдар цар. Теша лов, къиза дуне меттадоагӀаргхиларах!
ГӀалгӀай къаман сийлен, дагалоаттама Мемориале дӀайихьар из кхетаче. Берий теникаш, зизаш дехкар гулбеннараша цига. ХӀара теник берий вахарца ювзаенна яр. Чайтоанг-теник йоаллаш дола лоа мо кӀай ахкаргаш урагӀдахийтар сигала. Ишттача хӀамашца дог ловзаш, даха дезаш дар къиза дегаш дараша доадаь бераш. Сигала къайладоалаш лаьттача царна тӀехьахьежарий дегашка фу доалл ха хала дацар. Берий вахар иштта хадаш ха ма йоагӀийла кхы, яхача уйлашца тӀехьахьежар уж.
Тахан вай кара дукха да. ХӀара бера вахар мах баь варгвоаца совгӀат долга кхетадеш даха деза вай. Цхьаккха сага бокъо яц бера тӀакхувда! Иразе, беркате, гӀоза вахар дуаш, доккхача дикашка бодача наькъ тӀа дог паргӀата долаш даха дезаш да хӀара бер. Беро лаьрхӀа дика хӀама кхоачашхилийтара тӀехьа къахьега деза вай. Бера бокъонаш лораяр - вайх хӀаране доккха декхар да! Мехка дӀабихьача болама юкъе дакъа лоацаш боккхийбараш санна, бераш а дар. Ма дукха хӀама теркалде, зе йиш я берий бӀаргашкара.
Царех хӀарадар ираз долча деношка кхача гӀерт, даиман дог делаш, паргӀато йолча мехка гӀолла гӀа боаккхаш дӀахобаха лерхӀ. Барт, машар бола вахар хьакхолла дезараш вай дерригаш цхьана да. Боламе гулбенна мел хиннача наха белгалдир из: «Турпала никъ» яхача Юкъарча кхела мехка программан доакъашхо, «Россе эпсараш» яхача исполкома моттигерча оагӀон хьалха латтача Галай Руслана; шахьарий, кхалений моттигий администрацешкарча болхлоша, иштта кхыбараша а.
Болам чакхбоалаш, массанена доккха баркал аьлар: из дӀабахьа гӀо даьча Наьсарерча мэра Оздой Руслана, цун гӀонча йолча Алхастанаькъан Хадена, иштта культуран гӀулакхех йолча министерствонна кулгал деча Лаьнанаькъан Залинайна, министерстверча болхлошта.
