Боккхача тӏема котало йоаккхаш, лаьттараш бицлургбац
ӏилман балхацара конференци я, вай мехка дӏахьош
Сийлахь-боккхача Даьймехка тӏема Котало кхаьча 80 шу дизара хетаяь «Россе къамий истореца цӏаккха а бицлургбац Сийлахь - боккха Даьймехка тӏом» яха ӏилман балхацара конференци дӏайихьар, Гӏалгӏай паччахьалкхен университете. Цига гулбелар истореца дувзаденнараш лоархӏаме дола историкаш, ӏилманхой, хьехархой, аспиранташ, студенташ.
Конференци хьаеллаш мехкадаьгара Келаматанаькъан Махьмуд-ӏаьлагара къамаьл дир Мехкадаь, Паччахьалкхен Администрацена кулгал деча Мархенаькъан Анзора.
Ший къамаьла юкъе цо белгалдир, боккхача тӏема истори довзаш, тохкаш хилар массахана вайна лоархӏаме долга. Вай лаьтташка чугӏерта моастагӏа вохаваь, эккхавеш яьккха котало, советски адам шоайла тӏаотташ, деналца духьалъотташ хиларца кхаьчалга тӏатехар цо. Дӏахойодача хана а, хьинаре къахьегаш дӏабаха даькъалабийцар цо конференце дакъа лоацаш хиннараш.
Гӏалгӏай паччахьалкхен университете дешара балхацарча оагӏон проректор йолаш хьагеш йолча Лаьнанаькъан Светланас университета ректора цӏерах, аьттонца къахьегаш, шоай гӏулакх дӏадахьара тӏахьийхар гулбеннараш.
Цо белгалдир, иштта йола ӏилман кхетаче дӏаяхьар вайна массанена лоархӏаме долга, боккхача тӏема истори кхоана ураоттаргбарашка ше ма дарра дӏакхоачаргдолаш тахан хьинаре къахьега дезилга, истори лораде дезилга.
Конференце программанна юкъе боккхача тӏемах лаьца дукха хаттараш дар. Эггара лоархӏамегӏа дар, фашист вохавеш, Котало яккхара тӏехьа Кавказерча къамаша лаьцачача даькъах, моастагӏа вай моттигашка чугӏертача хана, Кавказо кхебаь майра дегаш дола къонгаш фашиста вӏалла ца меттача тайпара духьалаъоттарах, къаьстта Кавказе эшаварах, моастагӏчун хӏама дикка кӏалдисалгах.
Тӏема истореца дувзаденна мел дола хӏама вайх хӏаране дега лоархӏаме долаш, лорадеш хила деза, из деррига довзийташ ураоттае еза вай къона тӏехье. Советски Союза кхыдолча къамашта нийсса моастагӏа вохаве ураэтта, зӏамигвар а воккхавар а Коталон ди гаргадоаладе гӏерташ, лаьттаб Кавказа моттигашка.
Эггара бирсагӏа, лирагӏа хиннача тӏемашта юкъе; фашист вохавеш лаьттача къаман къонгех дийцар кхетаче.
Культуран, дешара, исторе оагӏонашца геттара лоархӏаме йолга белгалдир иштта йола кхетаче. Тохкама балхаш дӏахо дӏахьоча наькъ тӏа накъадаргдарех, юкъедоаладе дезарех дийцар гулбеннараша.
Сийлахь - боккхача Даьймехка тӏема истори, мел дукха ха яхарах, цӏаккха а дицдала йиш ярех дац.
Боккхагӏчар зӏамагӏчарга дувцаш, бӏаьшерашка из дахаргдола, цун хӏама довргдоаца болх ба лоаттабе безар.
