Къонача турпала денал
Хила яха ши кхалсаг кӀалхаръяьккхар кӀаьнка
ХӀара дийнахьа хоз вайна, турпалал гойта моттиг корайоагӀа массахана, оалаш. Из иштта долга хьагойт вайна вахаре нийслуш долча цхьацца хӀамаша. ХӀаьта цхьайолча моттиге саг чӀоагӀа кадай, сиха, деррига дита оарцагӀвала везаш хул. ГӀо эшача сага оарцагӀваха кийча хилар - дегӀаца чӀоагӀденна, ураоттача хана Ӏочуделла хӀама да. Иштта белгалваьннача цхьан сагах лаьца дийцар «Сердалога» Галашка яхаш йолча Хьаьшанаькъан Заремас.
ЦӀаккха а дицлургдоацачох дувцаш, цо тхога язду: «Са бӀаргашта гуш нийсделар из хӀама, хӀанз а кино санна духьаллатт сона из. БӀарга цӀацкъам тохача юкъа нийсделар из, Дала къахетам баь ИбрахӀим цига нийсвеннавецаре, сона хац фу хила йиш яр… Цу сага даьр бокъонца дола турпалал дар! Хье ца луш, уйла еш ца латташ, маркъилг санна чукхоссавенна, хи чура йоккха ши кхалсаг араяьккхар цо. 15 шу даьнна мара а вац из! Из тайпара дог, денал дола саг тахан вайна массанена масал да.
БӀарахой ИбрахӀима цӀи доккхалца яха езаш я аьнна хет сона. АллахӀа иразе, сийрда болба цун вахара никъ. Иштта дола бераш - вай беркате кхоане! Галашка вахача пхийтта шу мара ца даьннача БӀарахой ИбрахӀима доккха баркал кхайкаде лов сона! Дукха ха йоацаш, дӀайха денош латташ, гаргарча нахаца хина юхедахар тхо. Хьийдда, бирса доагӀача Эса оагӀонца дӀа-хьа ухаш лелар тхо.
Цхьа кхалсаг хи чу уллача кхера тӀа яьнна, кулгаца ший юхьах хий кхарза эттар, бакъда, кхера тӀара лайжа хи чу ежар из. Юхе лаьтта шоллагӀа йола кхалсаг из хьалаца енна, цун тӀехьа чуежар. Даггара пурх беш доагӀача бирсача Эса талгӀеша Ӏохьош латтар шаккха кхалсаг. Хи чура арабовла ца могаш, бисар уж. Цу миноте юхе нийсвелар ИбрахӀим.
Ший вахара уйла ца еш, царна тӀехьа чутоссавелар из. Шаккха кхалсаг хьалаьца, талгӀеш кӀеззига лаьгӀагӀа йолча моттиге гӀолла арабаьхар цо. Царех цхьа кхалсаг сакхетам чура яьннаяр. Цхьа моллагӀа волча воккхача сага кхоачашде низ хургбоаца гӀулакх дар 15 шерга кхаьчача кӀаьнка карагӀдаьннар.
Бокъонца вола турпал ше волга хьагойтар цо, ший уйла ца еш, кхыбараш кӀалхарбаха чутоссавенна. Иштта бола нах вайна юкъе бовзаш хила беза, аьнна, хет сона. Боарам боацаш да денал долча цу кӀаьнка карагӀдаьннар. Къахетаме волча Дала лоравеш воахаволва из укх дунен тӀа! Цу масало хьагойт, вай мехкарча кагирхошта юкъе эздий, хьаькъалах бизза, денал дола нах болга.
Вай къаман нах гӀо эшачун юхегӀолла тӀехбаьнна дӀагӀоргбац, вӀаший оарцагӀъаха Ӏемад вай. Иштта йола оамалаш, бера хана денз, дег чу кхееш ураоттае еза вай тӀехье. Дуккханешта хоза масал да ИбрахӀима гойта майрал, къонахчун дог долаш хилар. Ма эшалба вай вахаре, вай къаман юкъе сийдола, яхь йола, эздий нах!
