«УПЧ кулгал деш вола Цӏечой Ибрахӏим хьалхалатташ дӏайихьар из лоархӏаме кхетаче. Иштта цига гулбеннабар кхыбола болхлой а. Царна юкъе вар Наьсарера прокурор Чербажанаькъан Ибрахӏим, унахцӏенон гӏулакхех йолча министерствон кулгалхочун гӏонча Угурчанаькъан Хади, республикерча къахьегама гӏулакхех йолча Россе министерствон тохкама оагӏон ФКУ «ГБ МСЭ» кулгалдеш йола Йовлой Дина, ерригача Россе заӏапхой республикерча оагӏонна кулгал деш йола Майренаькъан Хьава, Ерригача Россе къорача наьха моттигерча оагӏон хьалха латта Ахтоланаькъан Хасолта»,- дийцар «Сердалога» республикерча УПЧ.

Хьатӏаихача заӏапхой дукха хаттараш дар, тахка дезаш. Цу юкъе дар ӏаьдалгара могаш боацарашта хьадоагӏаш дола хӏама, молхашца, дарба дарца, иштта кхыдарашца дувзаденнараш. Хӏаране тӏадена хаттар, заӏапхошта къувлараш дикка доашхаш, тохкаш болх дӏабихьар кхетаче. Белгалдир, цхьаккха хӏама терко йоацаш дутаргдоацилга. Тахан мехка латташ йолча программашка гӏолла могаш дола гӏо лоаттадергда заӏапхошта. Цхьаццадараш сага бокъонех волча викала, ше тӏахьожам беш болх дӏахьоргболаш, теркаме лаьцар. Белгалде деза, иштта УПЧ тайп-тайпарча моттигашкара хьакимаш гулбенна дӏахьош йола кхетаченаш боккха пайда боаржабеш, наха атто еш йолга. Царга гӏолла дикагӏа довз наьха вахарера кхоачамбоацараш, дуккхача хана денз царна къувлараш. Халкъашта юкъера заӏапхой Денна хетаяь кхетаче яр укх наькъа дӏайихьар.

Вай массане кхетаде деза, дегӏа могашал эшаенна нах къаьстта лакха терко лоаттае езарех болга. Цу оагӏонцарча наьха хьашташ кхоачашдара тӏехьа, болх лоаттабе беза вай тахан. Хӏаьта хьакимаш цхьана вӏашагӏкхийтта дӏахьоча кхетаче дикагӏа аьттув боал из хӏама хьаллаца, цар бокъонаш лораяра тӏехьа къахьега.