Россе наьна Ди дездеш да лайчилла бетта тӀеххьарча кӀирандийнахьа. Цу сийрдача денна белгало дахкалерг оала зизиллг да.

Хозача зизо белгалбу, вай дунен тӀа мел дахача хана, вайца хулаш бола дег чура боагӀа наьна безам.

Из Ди белгалдеш, ГӏалгӀайчен культуран Цӏеношка дӀахьош я кхетаченаш. Концерташ, кхоллама гойтамаш иштта цӀайна хетадаь боламаш дӀахьош хилар дика таро я наьна сий де, берий начӀал гойта, хоза вӀашагӀкхетараш дӀадахьа. Сценаш тӀа хоза иллеш да доахаш, ноаношта хетаяь байташ ешаш да бераш, залашка къаьстта бола сатем эттаб.

Яндарерча культуран ЦӏагӀа «Хьамсарча ноаношта хетаю» яха программа дӀайихьар, хӀаьта халкъа артистка йолча Овшанаькъан Зарас цӀайца даькъалабийцар беррига ноаной, царна дицлургдоацаш дола хоза, безаме иллеш аларца.

Иштта цӀай дездеш хилар Мужеча, цига «Наьна хоза безам» яха программа дӀайихьар. Хӏара номер ноаношта дола совгӀат дар.

Къаьстта терко тӀаозаш бар «Са хьамсара нана» яха бераша кхеллача суртий гойтам. Цу гойтаме берий кулгашца баь хӀара болх наьнацара безам бувцаш бар.

Берий бӀаргашка нана массаза хул эггара хозагӀа, езагӀа, дикагӀа. Къонача суртанчаша шоай кхолламга гӀолла гойтар наьнацара шоай беррига безам, наьна йӀовхал.

Долакха-Юртарча культуран ЦӏагӀа «Дезала кхуврч - наьна дог» яха кхетаче дӀайихьар. Керттера хьаьший бар, «ГӏалгӀайче» яха Паччахьалкхен халкъа халхара ансамбль, зале гулбеннача наха дицлургдоацаш цӀай хилар цох.

Шоай кхоллама оагӏонаш гойтар викалаша, моттигерча начӀал дараша - культуран Цӏен хореографически кружока доакъашхоша. Цар «ЙиӀий халхар» яхача номеро дог гӀоздаьккхар гулбеннарий.

ЗӏамагӀа болча юртахошта вӀашагӀъеллаяр «Наьнацара салоӀам» яха программа. Массанена хоза хийтар, «Безамца хьамсарча ноаношка» яхача суртий яхь, из дӀахьош яр исбахьален говзала кружока кулгалхо Евкуранаькъан Хади. Дешархой боккхача безамца каьхата тӀа гойта болабелар шоай наьнацара безам.

Пхьилекъонгий-Юртарча №1 йолча ишколе, «Хьамсарча наьнах» яха дешара яхь дӀайихьар. Из кхетаче вӀашагӀъеллар культура Цӏен болхлоша, уж хьежар из дег чура дӀайха цӀай хозагӀа хилийта.

Кхетаче хьаеллаш моаршал хаьттар яхь дӀахьош хинначо. Цо баркал аьлар из цӀай хьаллоацаш цига мел хиннарашта.

ЛаьрххӀа дола кхетачен хьалхара дакъа чакхдаьлча, дешархой шоай программа дӀаяхьа болабелар. Доакъашхой, тайп-тайпарча классай дешархой, сцена тӀа арабаьлар ноаношта хетаяь байташ еша.

Зал еррига терко тӀайохийташ ладувгӏаш яр. Хӏара кхоллама даькъ тӀа хозаш дар ноаношта баркал оалаш дола дешаш, уж байташца кхайкадеш, хозача берий кӀаьдача оазаца хозаш хиларо дог хьестар ноаной.

Хоза кийчо яь цӀай дӀадихьар Арштерча культуран ЦӏагӀа а. Хоза, сийрда кийчъяьча зало, зизашца хьалйизача хӀара миӀинга бӀарг сийрдабоаккхар. Цу дийнахьа керттера маӀан дар - мах баь варгвоаца безам цу зале хиннача ноаношта балар.

Цӏай дӀахьош керттера дакъа лоацаш бар культуран-салоӀама урхаллене Ӏомалуш бола дешархой. Къонача артисташа дег чура гойтар шоай начӀал.

Кхетачен программа чуйоагӀаш яр тайп-тайпара номераш. Бераша дӀаоалаш хинна наьнах дола иллеш моллагӀчун а дог тохадолийташ дар, иштта хоза хеташ ладийгӏар дег чу ювшаш хиннача наьнах йолча байташка; хьежар хореографически композицега.

Бераш хьежар ма хулла шоай ноаной дегаш гӀоздаха, из хоалуш дар цар дӀаоалача хӀара дешаца.

Кхетаче чакхъяьлар дӀайхача дешашца, дукха тӀоараш детташ, гулбеннараш раьза болаш.

Наьна Ди - из ханорга тӀа хинна Ӏац. Цо гойт из ха мишта белгала я, къаьстта нана мел лоархӀаме я вайх хӀаранена. Цу дийнахьа лоархӀаме да дешашца хинна а ца Ӏеш, гӀулакхашца ноаношцара безам белгалбар - доккха деце а совгӀат далар, цӀагӀарча гӀулакхашца новкъостал дар, царна уллув хилар. Наьна безам - из мах баь варгвоаца совгӀат да, вайна хӀара денна йӀовхал луш дола.