Онлайн-кхадж тоссаш дакъа лоацаш, Кердача Реданта бахархоша тоабе хержар Бекбузаранаькъан урам. Цу урам тӀа асфальт Ӏобиллаб, сердал а ӀоегӀай, наькъа белгало еш оасаш а даьхкад. Цу тайпара, из урам тоабаь баьннарех пхийттлагӀа ба, из моттиг геттара чӀоагӀа кердаяьлар «Шахьара дика хьалаш» яха проект кхоачашъеш хиларах.

МагӀалбика бахархоша белгалдаьд тоаде деза юкъара доазув, дукхагӀа кхадж тессарех ба Заьзгакъонгий-Юртара Центральни урам.

МагӀалбика кхален доал деча даькъ тӀара наькъаш тоадеш латт, ГӀалгӀайчен наькъа фондерча ахчах. Карарча шера, наькъаш тоадара, керда наькъаш Ӏодахкара хьахьожадаьд 15,7 млн сом.

«Заьзгакъонгий-Юртарча Орцханаькъан урам тӀа тӀоникъ Ӏобиллар, иштта тӀоникъ биллар СоагӀапчарча Западни урам тӀа, Грозненски урам тӀа асфальт биллар.

Инаркъе Ӏоахарганаькъан, Укуранаькъан урамаш тоадир. Йоккхача-Ачалкхера М. Ломоносова урама наькъаш тоадир, 20 керда сердалон бӀоагӀий оттадир СоагӀапча ЦӀокъанаькъан урам тӀа. Цул совгӀа, аз хьалхашка оттадаьча декхарах, Йоккхача Ачалкхе Коталон 70 шу яхача урам тӀа асфальт биллар. Из кхы деррига а дац, даь даьнначунга хьежача. Карарча шера 18,5 млн сом мах бола наькъаш тоаде лаьрхӀад Йоккхача Ачалкхе, Заьзгакъонгий-Юрта, Южне, Инаркъе асфальташ доахкаргда, Даби-Юрта, СоагӀапча тӀонаькъаш дергда», - аьлар ший телеграм-канале ГӀалгӀайчен кулгалхочо Келаматанаькъан Махьмуд-Ӏаьлас.

Наькъаш эшаш хилар лоархӀаме да. Наькъаш дегӀадоаладаро экономика а дегӀайоалаю, наьха вахара хьалаш, экологен хьал тоаду. МагӀалбика кхален дика хьалаш хилийтара, наькъа кхерамзлен Ӏалашо яра деш дар кӀезига дац, цудухьа из дикача оагӀорахьа Ӏаткъаш да вахара даькъ тӀа.

ГӀалгӀайчен Кулгалхочо теркам тӀабахийтар моттигерча хьакимаша нахаца бувзам лелабара. Цо белгалдир, каст-каста нахаца хаттараш тохкаш, царна фу эш хьожаш кхетаченаш дӀахьош хиларо МагӀалбика кхален бахархой вахар дегӀадоаладергда, аьнна.