Къахетамах, дикалах дизза дола цӏай
Дегӏа могашал эшаеннача берашта лаьрхӏа, цӏай дӏадихьар Наьсарерча РДК
Наьсарен кхален культуран Цӏагӏа заӏапхой халкъашта юкъерча Денна хетадаь цӏай дӏадихьар. Дегӏа могашал эшаеннача берий, царга хьожачар дегаш хьаста аьнна; вӏашагӏделла цӏай дар из. «Цига ена хилар «Маьл» яхача гӏо деча ганза кулгал деш йола Дзейтанаькъан Лейла, ерригача Россе заӏапхой юкъарлен моттигерча оагӏон хьалха латта Колой Хьава, Наьсарен кхален администраце кулгалхочун декхараш кхоачашдеш вола Исмейланаькъан Темарлан, Наьсарен кхалерча администраце болхло Саганаькъан Мадина, райсовета кулгалхо Эккажанаькъан Идрис.
Йоккха концертни программа яр гулбеннарашта кийчъяь хиннар», - дийцар «Сердалога» кхетаче дӏахьош хиннараша.
Гуш дар, берригаш дог гӏоздаьнна, сакъердалуш болга. Къаьстта йоккха терко тӏаозаш бар гӏалгӏай къаман артист волча Хулаганаькъан Артура кхебаь эстрадно-джазови кружоке къахьегараш. Шоай мел дола начӏал гучадоаккхаш хьайзар сцена тӏа Йовлой Ева, Беканаькъан Бэлла, Ольховская Алиса, Бохтаранаькъан Хьава, Султиганаькъан Хадижа, Бохтаранаькъан Хадижа. Иштта сцена тӏа къахьийгар Эккажанаькъан Мадинас кулгалдеча «Сийг» яхача Берий театро. Театра артисташ шоаш леладечунца дог ловзаш болга теркалдир хьажархоша. Гуш дар, цу кхетаченга цар дикка кийчо яьлга. Массане, геттара чӏоагӏа тӏоараш детташ, арабаьлар республике дика бовзаш бола артисташ Пхьугой Амир, Оздой Адам. Гулбеннарий дегаш сомадоахаш, дегӏа могашал эшаенна долча берий дог хьоасташ, низ чуболийташ къахьийгар цар.
Белгалде деза, из концерт лакхача боараме чакхдаьннилга. Гулбеннараша доккха баркал аьлар цу программанна кулгал деш хиннача Хулаганаькъан Артура. Зале даьгӏача дегӏа могашал эшаенна долча берашта тоам бе, уж гӏаддахийта гӏерташ, чӏоагӏа къахьийгар цо. Дерригача берашта мерза совгӏаташ, иштта кхыйола хӏамаш дӏаекъаш дӏайихьар программа. Заӏапхошта гӏо де безам барашта лаьрхӏа, ахча чутувса яьшка оттаяьяр зале. Цу дено вайна дагадохийт, дегӏа могашал эшаеннараш массахана терко е езаш нах болга. Воашта могаш дола гӏо деш, цу наьха дог хьаста хьожаш, хила деза вай тахан. Из да лоархӏамеча декхарех, из да массане хьаллаца дезарех! Дог делаш, вӏалла а хӏамах дог ца эккхаш, бахалба уж!
