«Тха культуран ЦӏагӀа гулбелар №25 йолча моттигерча ишкола йоккхагӏча классай дешархой. Цига дакъа лоацаш вар дин викал Байсахаров Мовсар. Берашта дийцар вай мехкахошта СВО дӀахьош карагӀдоалачох; денал долаш цига моастагӀчоа духьалъотташ, хьалхарча мугӀарашка латтача вай бӏухоех лаьца; Россе хургдар къоастадеш, вай кхоане сийрда хургйолаш дӀахьош болча тӀем тӀа шоай майрала, денала тӀема гӀулакхаш гойташ болча турпалхоех», - аьлар «Сердало» газетага культуран урхаллен кулгалхочо АлероевгӀар Билала.

СВО бӀухочо, Албохчанаькъан Жабраила дийцача къамаьло, тӀем тӀара сурт ше ма дарра къаьгга гойтар, дешархошта из лоархӀаме урок а яр.

Къамаьл деш керттера терко тӀаяхийтар бӀухочо тӀема вошал леладара - тӀема хьалашка бӀухоша шоайла лелабеча бувзама. Тӏема вошал- из да хьай вахарал дезагӀа хьай новкъоста вахар лархӀар», - аьлар цо. Уж дешаш хинна Ӏац, из цу хьалашка хьакхоллаш дола вошал да.

Сержанта дийцар цӀера алах чакхдаьннача вошалах, шоайла тӀаотташ хиларах, кӀалхарвала цхьаккха таро яц-кх аьнна хийттача хана, хьона гӀо де воагӀаш волча бӀухочун деналах.

Эггара чӀоагӀагӀа дар тӀеххьара Жабраила дийцар, ший вахар хувцаш нийсденна хьал.

23 шу даьлча дукха хӀама де лерхӀаш, хьалха боккха вахара никъ болаш хул вайх хӀаравар. Бакъда Албохчанаькъан Жабраила хьалхашка из хаттар эттар доазув къоастадеш, кхы уйла е моттиг ца юташ, ший са дӀаденна а новкъостий кӀалхарбаха безача из эттача дийнахьа.

АргӀанара разведка декхар кхоачашдеш, Жабраила тоаба унзарча хьале нийслу. Дикъа дохк доаллаш, дика хьалаш дар вай бӀухошта моастагӀчунна къайлагӀа тӏакхача. БӀухоех цхьанне а теркалъянзар дагадоацаш тӀайоагӀа дрон. Цхьа секунда ялалехь, из хьал хувцаделар унзарча оагӀорахьа, цӏацкъам тоххал юкъ мара яцар кӏалхарвала йисар.

Жабраила сихонца лаьрхӀар де дезар фуд. Цо, кхы ха ца йоаеш, цхьан когаца дрон юстаркхессар, ший новкъостий болчара. Из ийккхар. Новкъостий дийна бисар, бакъда сержанта йоккха чов хилар - цун кога кӀийле дӀайоаккхаш.

Дӏахо бӀухочун хьалхашка лаьттар боккъонцахьа дола Ӏазап дар. Жабраил диазза эттӏавир. Лораша шоашта могар дир цун ког дӀа ца баккха гӀерташ, хӀара сантиметр лораеш. Бакъда лаьрхӀар хиланзар, дегӀар мара - ког боахкабала болалуш бар. Сержанта вахар кӀалхардаккхара, лораша эггара динза даргдоацр дир - ког дӏабаккхар.

Ший уйла ца еш, кхыбарий вахар лакхагӀа оттадеш йола моттиг сага эггара лакхагӏа мах бола оагӀув я. Жабраила ший уйла яьяцар цу хана. Цо шийна дего хьалдаьккхар дир. Бакъда цо ше кхоцавар - из дац цун никъ цигга кхоачабалар, из да керда вахара оагӀув дӀайолалуш хилар, цига хӀара дийнахьа гучадоал тӀема вошал, денал.

Хӏанз Жабраила кийчъеш я протез, из оттаяьчул тӀехьагӀа, из юхаваха лаьрхӀа ва тӀема операци дӀахьоча даькъ тӀа.

Цун дувцарга ладийгӏараш уйлангахьа бахар, цар дика кхетадир боккъонца дола мах бараш малагӀаш да; денал долаш, Даьхе езаш хиларо мел боккха низ лу сага. Дешархошта шоашта духьала вагӀаш гора боккъонца вола саг, книжка тӀара а воацаш, ше леладаьр ма дарра берашта гойташ вола, ший дег чу йӀовхал лораю, из нахаца екъа кийча вола дийна саг.

Албохчанаькъан Жабраилацара кхетаче лоархӀаме хилар дешархошта. Цо хьалхадаьккхар царна вайна уллув тахан бахаш хилар денал, майрал дола нах, уж духхьал хоза дешаш хинна Ӏац, уж гӀулакхаш леладераш ба вай санна бола нах.

«Карарча хана, лаьрххӀа йола тӀема операци дӀахьош Дола-Коара пхийтта саг ва, Даьхе бахьан шоай са дӀадала кийча болаш, денал гойташ, моастагӀчоа духьалъэтта», - аьлар тхога Алероевгӏар Билала.

Цу дийнахьа кийчбаьбар гойтам, цига сий дир СВО дӀахьош бейнача бӀухой. Гойтаме го йиш яр вай мехкахошта карагӀдаьннар, цар тӀема никъ, уж даим исторе оагӀон тӀа хургба, адамий дегашка а латтаргба вай мел дах.