2018-ча шера дӏаболабаь из болх дикка гаьнабаьлар. Из гӏулакх дӏатӏаийцар бехктокхаме саг цахиларах, болх соцабаь лаьттар. Бакъда, мехкарча Паччахьалкхено къахьийга, федеральни оагӏоно гӏо деш, болх юха дӏаболабир. 387 миллион сом совгӏа рузкъа да цу моттиго дӏалаьцар.

Карарча хана керттера балхаш йистедаьннад. Поликлинике эшаш дола гӏирсаш оттадеш болх ба дӏабахьа безаш. Уж я УЗИ аппараташ, кизга увтада, КТ, пехкашка болх байташ дола гӏирсаш (ИВЛ), иштта кхыйола хӏамаш а. Уж ӏооттаяьчул тӏехьагӏа, кабинеташка эшаш йола кхыйола хӏамаш хьачуена, ер шу чакхдоалача хана, хьаелларгья поликлиника, Дала аьннадале. Керда поликлиника наьха вахара хьал дикка аттача доаккхаш хургья.

Цу чу хургья терапи, хирурги, стоматологи, кхалнах тӏаийбу кабинет, иштта сага деррига дегӏ чакхдоаккхаш йола КТ, кизга увтаду моттигаш. Цул совгӏа, унахой бийса хиллалца цу чу бада йиш йолаш хургба. Поликлиника гонахьара доазув баьццардерзадеш, кулг тохаш, боахк тахан.

«Поликлиника болх дикка гаьнабаьлар цу гӏулакха хьалхаэттар тешаме саг цахиларах. Республикерча Паччахьалкхено дукха къахьийгар из болх чакхбаккха гӏерташ. РФ Паччахьалкхено гӏо даь, 2022-ча шера ахча хьакъоастадир цу балха, 2023-ча шера из болх юха дӏаболабе аьттув хилар», - белгалдир вай мехкадас Келаматанаькъан Махьмуд-ӏаьлас. йиллача ханал гаьнаяьнна, болх чакхбаьнна ца боалаш, латта гӏишлош йистейоахаш, къахьег тахан вай мехка.

Шолжа-Шахьарера поликлиника кийча хилар бахархошта доккха совгӏат да тахан, хӏана аьлча берригаш дукха хьийжа болх ба из. Шахьарера арабовла ца безаш шоай дегӏа хьал тахка, дарба де аьттув ба хӏанз цигарча наьха. Хӏара денна адам дебаш латтача шахьаре из геттара лоархӏаме да. Унахцӏенон оагӏонца баьккха лоархӏаме, боккха гӏа ба Шолжа-Шахьаре керда, таханарча хано дӏадеххача тайпара кийчъяь поликлиника хьаеллар. Цигарча бахархошта санна, боккха аьттув ба из шахьара гонахьа ядача юрташкарча наха а.