Ӏадаташта терко лоаттаяьй къамашта юкъера доттагӀал, бувзам чӀоагӀбеш, из хьадоагӀаш да Советски Союз хиннача хана денз. Из цаӀ дикагӀчарех дола гӀулакх да, хӀана аьлча укх дунен тӀа эггара дукхагӀа къамаш даха мохк ба Росси.

Вай мохк хьакхеллача хана денз, вӀашагӀделлад, хӀара къаман тайп-тайпара викалаш хургболаш. Къамий хьашташ чулоацаш, цар йоакхо еш хилар гуш да Москверча О. Кутафина (МГЮА) цӀерагӀча паччахьалкхен юридически университете, вайнаьха викалаш цига хиларах.

ГӀалгӀай-нохчий юкъарло ший болх бе йолаелар 2007 шера, из болх вӀашагӀбеллар, дукхача бӀаьшерашка денз шоайла лоалаха дахача къамашта юкъера барт, цхьоагӀо чӀоагӀъяра.

Дешара моттигерча болхлоша яхачох, вайнаьха къаман викалаш эггара чӀоагӀагӀа хьинаре къахьегарех ба.

Цхьан тоабан юкъе болх беш хиларо, дешар тӀа толамаш хулийт. Цудухьа студентий дешарцара безам а совбоалаш ба, уж шоай мехкарча викалашта юкъе хиларах.

Цу балха тоабо хӀара шера, халкъа ДоттагӀала фестивалаш дӀахьу. 2024 шера оагӀой бетта, вай мехкахоша гойтар къаман Ӏадаташ, хьоалчагӀа дӀадахьар. Кагирхоша дӀайихьача зӀамигача спектакла чудоагӀаш хиннача даькъ тӀа дицлургдоацаш дисар хьажархой дегашка вай хоза Ӏадаташ.

Тушола бетта, МГЮА вахаре лоархӀаме моттиг хилар. Из университет хьайийллача денз вайнаьха кухне Ди дӀадихьар хьалхара. Сцена тӀара хаза йиш яр ерригача Кавказе а иштта Россе а гӀолла дика йовзаш йола ашараш.

Цхьаккха цӀай дӀадодац цар, сийрда халхараш, иллеш доацаш, цар вӀашагӀтох шин къаман культура, кхетам балар, лоӀам хилар.

Вай мехкахой дегӀабоагӀаш ба культуран, спортивни доакъош тӀа. Ховш ма хиллара, республике кӀезига ба хоккеисташ. Бакъда ГӀалгӀайчен студенташ чубоагӀаш ба Москверча О. Кутафина цӀерагӀча паччахьалкхен юридически университета. Хила тарлу, вуз яьккхачул тӀехьагӀа, цӀабаьхкача цхьаболчар гӀалгӀайчен хоккейца шоай вахар дувзадеш. ХӀара тренера ший командаца дӀахьош бола болх нийса вӀашагӀболлаш хиларах, тийша хул из дукхагӀча хана.

XXXVӀӀ сезона Московски ловзараш дӀахьоча хана, Боканаькъан Адама даьхача толамех доккха совгӀат хилар вай мехкарча викалашта. Цо, 60 кг дозал долаш, шийца дзюдох яхьеваьннача спортсменагара котало йихьар, цунца ший университет гӀад а югаш.

Тхона гуш да, ГӀалгӀайчен доазол арахьа дешаш болча вай студенташа дика толамаш доахаш хилар. Уж, шоай дешара терко тӀайохийташ, вахара нийсагӀа йола оагӀонаш лелаеш, хьабоагӀа. Хоза хет, шоашта хьалхашка оттадаь декхараш кхоачашдеш, нийса никъ дӀахьош бола кагирхой вай хилар.