ВАИ инспектор волча Котанаькъан Ислама кулгал деш болча оагӀон хьалхашка латтар лоархӀаме болх ба. Керттера декхараш кхоачашдарал совгӀа, кхерам шоашца бола моттигаш юстаръяха езаш ба уж, хӀаьта цхьа дагадоаца хатар эттача, тӀема эскар кӀалхардоаккхаш болх дӀабахьа беза.

ЧӀоагӀа фийла, хӀара хӀаман кӀоарга уйла еш хила везаш болх ба цар дӀахьор. МоллагӀа хӀама нийсделча даим кийча хила безаш, беха ца хьовзаш, духьалъотта безаш ба. Хьалхарча дийнахьа денз, тӀема операценна юкъе болча Росгварде бӀухошта дика довз уж декхараш. Шоаш дӀакхаьчача лакха денал гойташ,  декхараш дизза кхоачашдеш хьабоагӀа ала йиш ярех ба уж нах.

«Ишттача моттиге декхараш кхоачашдеш, ВАИ доакъашхой шоай болх лакхача боараме дӀахьош, моллагӀча халон юкъера арабовла ховш, фийла, нийса хьовзаш хила беза»,- белгалдир республикерча Росгварде оагӀон зарбан болх дӀахьош йолча Сампенаькъан Салимас.

Кхыйолча моттигашцарча бувзамах хьоадича, УГИБДД оагӀонца ба уж массахана. ХӀара шера дӀакхухьача кхетаче белгалду бокъонашта юкъедихьа хувцамаш. ТӀема, балха лелаеча, ший доалахьарча машинаца хула хатараш ма хулла лаьгӀде гӀерташ болх дӀакхухь цар цхьана. Ханнахьа машинашка хьожаш, кхоачамбоацараш гучадоахаш бола болх дӀахьош къахьег цар, диагностиках дола карта леладу. ТӀема машиний инспекци массахана лакха лерхӀам болча оагӀонех цаӀ я. Шоай гӀулакх тӀехдика леладе гӀерташ къахьег цу оагӀон доакъашхоша.