Лакха говзал, артистизм гойташ хилар цига вай йиӏигаш. Хӏаьта царна хьалхаяьннар яр Россе культуран оагӏонца цӏихеза болхло йола Малсаганаькъан Зарема. Фестивале геттара белгала хилар «Инструменташ дӏалакхар» яхача оагӏонца Бузуртанаькъан Хьавас дакъа лацар. Майер Ханессай «Балетера дакъилг» яхача произведенега гӏолла ший начӏал гойташ яр йиӏиг тӏахьожаш хиннарашта.

Гуш дар ший гӏулакх дика довзаш, шаьрдаь из йолга. Наьсарерча ДШИ баркал кхайкадеш, хьалхара моттиг яларца дошо майдилг ӏоэллар Хьавайна цу дийнахьа. Иштта дикка белгалъяьлар цига Мутаӏаланаькъан Жасмин. Цо хержаяр Хачатурян Арама «Андантио» яха произведени. Массане тӏоараш тохаш, баркал оалаш, ший лакха начӏал дӏахьокха аьттув баьлар цун. Хьалхара моттиг елар Жасминайна, дошо майдилг ӏоэллар цунна а. 

Яхьий программаца эггара белгала хиннарех яр Мутаӏаланаькъан Амалии Бузуртанаькъан Хьаваи цхьана хинна фортопианни дуэт…Прокофьев Сергея «Золушкий ловзарга дӏаяхар» яха цӏихеза пьеса йовзийтар къонача пианисткаша. Хьалхара моттиг, дошо майдилг йоаккхаш, болх хилар цох. Мутаӏаланаькъан Жасминас массехк тайпара говзал караерзаяь артистка ше йолга дӏахьекхар яхьашка. Халхарий хьехархо йолча Лаьнанаькъан Дале кулгал деш «Къаман халхар» яхача оагӏонца «Хьаста юхера халхар» яха номер гойтар цо гулбеннарашта. Шоллагӏа моттиг а, цхьаькха майдилг а луш белгалъяьлар Жасмин.

«Селий мехка цӏераш» яхача фестивале дакъа лоацаш хиннараш бар российски, дунен культуран оагӏонцарча институташкара нах. Хӏаьта цу гӏулакха хьалхаэттараш – Дунен Артийски комитет, Евразийски Континентальни Артийски комитет, Россе халкъа Артийски комитет. Проект хьаллоацаш болх дӏабихьар Россе къамий Ассамблейс, Халкъашта юкъерча кхоллама академе, Россе халхарчий Союзо, «Россе культуран фронто».

Иштта тӏахьожама болх дӏахьош хилар Халхарчий Союз, Селий мехкарча ашархой Союз. Культуран оагӏонцара бувзам чӏоагӏбеш, сцениченски оала кхоллам бовзийташ йола кхетаче хилар цох. Наьсарерча берий кхоллама ишколера къонабараш иштта белгалбалар, цхьа цӏаьхха нийсденна хӏама да ала йиш ярех дац… Хьехархоша хьинаре, дукха къахьийгад цу оагӏонца, къона артисткаш шоаш а, тӏатеӏӏа, болх дӏахьош, шоай говзал кӏоаргьеш, шаьръеш хиннаб. Бузуртанаькъан Хьавас, Мутӏалнаькъан Жасминас, Амале дукха сахьаташ дӏакхихьад кийчо еш, хӏара моттиг лакхача говзалца тоае гӏерташ.

Селий мехка дӏайихьача йоккхача фестивала хьагойтар вай йиӏигаш лакха начӏал долаш, шоай гӏулакх боаггӏача боараме карадерзаде ховш, шоашта «тӏоараш тохийта» говзал йолаш йолга. Къаьстта доккха баркал ала дезаш да хьалхалаьттарашта, царца дӏаьха сахьаташ доадеш къахьийгарашта. Культуран оагӏонца цӏихеза болхо йолча Малсаганаькъан Заремайна, иштта йиӏигашта лоархӏаме хьехамча хинна хьайоагӏача Лаьнанаькъан Далена баркал ала доагӏа цу коталонах, ишколан ганза кхы а массехк майдилг ӏотӏакхетарах.

Кхоллама ишколе хьехархо волча сага хьалхашка латтараш цхьа моллагӏа декхараш дац… Хьинаре къахьега дезарех ба уж деррига теркалдеш, цхьаккха хӏама юстара ца дуташ. Хӏаьта хьехархой, деша багӏарий уйла, нигат цхьанкхеташ хилча, толамга кхоачавеш бола никъ а иштта чоалхане хетац. Дербенте котало яьккха, дошо майдилгаш яхьаш цӏенах кхетар доккха да кхоллама ишкола кулгалхошта, иштта йиӏигашта шоашта а!. Эггара лоархӏаме дар да сага ше хьалаьца никъ беркате, пайдане хургболча тайпара дӏабахьар, шийна гонахьарбараш а дикача хӏаман тӏахьехар, боккхача толамга кхоачавеча наькъ тӏа хьинаре къахьагеш латтар.