Лорашта баркал аьлар Буро кӀалхарча вахархочо
Наьха унахцӀено лораераш
КӀай халаташ дувхача наха хӀара денна гойташ долча доккхача дикай хам баь даргдац вай цӀаккха! Сабар, сатем, боккха къахетам эшаш болх ба лорийбар. Хала хьал дола нах берзабеш, цар дега тоам хургбар мара ца оалаш, ди-бийса ца къовсаш уралатт уж. Цар деча гӀулакха лакха мах бераш дукха ба вайна юкъе. Царех вар Буро кӀалха вахаш вола Ведажанаькъан Микаила Булат. «Сердало» газетага яздаьча каьхата тӀа дувц цо, шийна оарцагӀбаьхкача кӀай дувхар леладеча турпалех.
«Укх бетта хьалхарча деношка, чӀоагӀа могашал эшаенна, Наьсарерча дарбанче Ӏочувигар со, кардиологически отделене дарба дӀадоладир сона,- язду Ведажанаькъан Булата.
Укх бетта 5-ча дийнахьа Ӏочувига 12-ча денга кхаччалца сога хьожаш, чӀоагӀа хоза кулг тохаш, дарба деш хилар лораш. Эггара хьалха хьоахае лов сона цу отделенена кулгал деш йола Могушканаькъан Хьусена Марет. ЧӀоагӀа дика, лакха говзал йола кардиолог я из, цун гонахьа болх беш мел хиннараш а иштта бехктокхаме шоай болх дӀахьош бар. Дег чу южаш яр лор-кардиолог Къоастой Мухьмада Аза. ХӀара Ӏуйран унахой болча хьачуяйя, могаш боацарий дог ураоттадора цо хозача къамаьлаца, хӀаране бийса мишта яьккхай хьожаш, саготдер фуд тохкаш. ХӀара унахочун дог тедергдола дош ала ховра цун. Вайна массанена хов, дегӀа могашал эшаеннача сага из деррига мел лоархӀаме да. Цхьайолча хана, молхаел, маьхел дикагӀа верзаву хозача, безамеча дешо.
Доккха баркал ала лов сона иштта лорий йижарий болча Янданаькъан Руслана Розайна, лора вешийна Заьзганаькъан Казбулата Идриса, лорашта-кардиологашта ТӀумхой Исраьила Фатимайна, Эсамарзанаькъан Исраила Фатимайна, Овшанаькъан Ахьмада Хадена, унахошта даа хӀама телаш йолча Хидиранаькъан Бахьаудина Лемайна. Уж беррига нах дика хьажарах, лакха терко ярах, Даьла къахетамца, Политехнически колледже сай болх бе аравоалаш ва со. ЧӀоагӀа доаккхал ду аз, вай дарбанче лакха говзал йола, боаггӀача боараме коронаграфи яккха ховш бола эндоваскулярни хирургаш хиларах. Уж ба Йовлой Рустам, Марзбиканаькъан Хьасан. Дошо кулгаш, дика дегаш долаш нах ба уж!
ИРКБ кардиологически отделене № 2 йолча палате дарба деш хиннача оаха - Ведажанаькъан Булата, ТӀумхой Беслана, Эсамарзанаькъан Мухьмада, Белтой Салмана доккха баркал оал цу беркатеча, хьинар долча, шоай болх боаггӀача боараме дӀахьош къахьегача наха! Хам баь варгвоаца доккха дика да цар унахошта дер!
Иштта цу мугӀаре дӀаоттае езарех я Магасерча поликлиникера лор-кардиолог Ӏалбаканаькъан Мусай Фатима. Эггара хьалха цунна тӀавахавар со се цамогаш хилча, Ӏалаьмате чехка Ӏовижа, дарба де деза, аьнна, хьайзар из лор».
Халача хьале эттачун деш долча новкъостала хам баь варгвац! ЧӀоагӀа хоза хет, иштта баркал оалаш, хам беш бола нах вайна юкъе болаш. ХӀаьта лакха начӀал долча, шоай болх боаггӀача боараме лелабеш, унахоех дог лазаш болча лорашка цхьаккха хӀама кхоачаргдац! Дог дехачун дог хьастар, мах баь варгвоацаш да! Иштта волча лора майрра тӀавода унахо, цо даь дика цӀаккха а дицлуц.
