Россе ЦӀеча ЖӀарга республикерча оагӀонна кулгал деча Султиганаькъан Мухьмада дика хов, гӀо де гӀерте, лозаваьчунна хийла зе деш моттигаш нийслулга. Лор-травмотолог волча цо 15 шу Ӏодиллад, цӀаьхха хиннача хатарех болча оагӀон болхло волаш. Цига болх беча юкъа цунна дукха байнаб, новкъостал де а бенна, унахо кхы а чӀоагӀагӀа халача хьале оттаваь нах. Хьалхара гӀо мишта де деза, фу лораде деза цахар да из. «ГӀо эшача сага юхегӀолла тӀехдаьнна дӀадолхаш оамал яц вай, бакъда из гӀо нийса де ховш хила веза саг, халача хьале эттачунна кхы а боккхагӀа Ӏоткъам бергбоацаш», - дийцар цо. ЦӀеча ЖӀарга мехкарча оагӀоно, хьалхара гӀо де нах Ӏомабеш, боккха болх дӀакхухь. Укх тӀехьарча 3 шера 30 эзар совгӀа бераш, боккхийбараш Ӏомабаьб 18 болхлочо.

Республикерча «Хьалхарчарца» гӀо дарах йола чемпионат дӀайихьар цар. 1-ча, 11-ча классашкара дешархой Ӏомабир дог сецачунна, дегӀа маьже човхаяьчунна нийса гӀо де. Из болх мишта дӀабахьа беза дӀахьокхаш, кхетаченаш хилар республике. «Хьалхарчар болам» яхача оагӀонца дикка белгалдаьлар бераш. «Из деррига боаггӀача боараме дӀагӀоргдолаш, къахьега деза тха тоабан. Хьалхарбараш Ӏомабеш, дикка къахьег цу оагӀонцарча говзанчаша. Из беркате проект йоаржаеча ЦӀеча ЖӀарга доккха баркал ала лов тахан.

«Хьалхарбараш» цу балхаца иштта гаьнабаьнна хургбацар, цар къахьийга децаре», - аьлар ерригача Россе берийи кагирхойи моттигерча оагӀонна хьалха латтача Албохчанаькъан Маринас. Таханарча кагирхошта юкъе дукха ба вахаре пайдане, беркате хургдола хӀама Ӏомаде, шаьрде ловраш. ЗӀамига болча хана денз, Даьла духьа гӀо деш лелачарех, моллагӀча моттиге накъабаргбола эздий нах хьалкхувргба. Лозаваьча сага хьалхара гӀо мишта де деза Ӏомадаьр накъавоалаш моттигаш нийслургья хана йӀоахала. Цу тайпара говзал йовргьяц!