Бералла доазув
Мехкарча цӀихезача берий лагера 25 шу дизад
Лоаман хозача моттигашта юкъе уллача берий «Аьрзи» яхача лагера 25 шу дизар укх деношка. Цу ерригача хана тайп-тайпарча моттигашкара бераш тӀаийдеш, дуккханешта шоллагӀа дола цӀа хинна, берий дегашца йӀовхал, безам бекъаш лаьттай из моттиг. Карарча хана цига салоӀаш да Курски, Запорожски областашкара бераш.
«Доккха концерт дар цига дӀахьош. Шолжа кхален культуран цӀен солисташ бола Бантаева ТӀаус, Барханой Заьлмаха, ЦӀечой Милана, Тамасханаькъан Адам, Хьава бар цига шоай начӀал гойташ», - дийцар «Сердалога» республикерча къаман кхоллама ЦӀен исбахьален оагӀонцарча балха кулгал деш йолча Абдурзаканаькъан Аьсета.
Цхьанне дийцар, тхьовра из лагерь хьаеллача хана, цига дакъа лоацаш хилар ше, яхаш. ХӀаьта тахан, геттара хоза тоаяь латтача цу моттига бӀарахьежаш, цхьа тамашийна хет, 1999-ча шера эггара хьалха ший наӀараш берашта хьайийлла моттиг духьалъоттае.
Берий лагерь, массайолча моттигашка хоза кулг тохаш, эргаяьккхай. Къаьна, тишъенна хӀамаш дӀайоахаш болх баьб, хӀаьта ков-м бокъонца йолча парках тара хет. Массе моттигашка да хувцамаш. Керда спорта доазош, ловза моттигаш, салаӀа къоастаяь моттигаш - из деррига берий санна, воккхачунна а бӀарг хьоасташ да.
Берий кхерамзлен хьал лорадара тӀехьа а, йоккха терко лоаттаю лагере. Бераша вӀаший доттагӀал тоссаш йола, вӀаший бувзам, барт чӀоагӀбу моттиг хиннай «Аьрзех».
Эггара хьалхарча дийнахьа денз, лагерера болх бовзарий дукха да тахан дувца. Абдурзаканаькъан Аьсета дувц, гаьннара ханаш дагаухаш: «Тайп-тайпара ши моттиг йолаш санна хеталу тхьовра хинна лагери таханара цун куци.
Деррига хийцад, тоадаьд; таханарча заманга хьежжа. Бакъда, цу хана хиннача тайпара цхьа дега йӀовхал луш, безаме, хоза я цу доазон тӀа».
Таханарча хано дӀадеххача тайпара тоаяь латтача лагере, керда дешара программаш я, шоай кхоллама оагӀонцара, спортацара говзал гучаяккха аьттув ба цига берий.
Тахан «Аьрзи» лагеро ший зӀамига хьаьший хозача, сийрдача куцаца тӀаэц, берий дегашта мел эшар долаш да, дог Ӏаббалца сакъерда, салаӀа аьттув ба цар цига.
Лагера 25 шу далар дицлургдоацача тайпара дездир. Ӏуйрийна денз, берий гӀар, белар лаьттар цига. Лагере къахьегарашта лоархӀаме ди дар из, цунга хьежжа, боаггӀача боараме дӀадахьа хьежар уж из ди.
БӀарчча дийнахьа сакъердаш хилар зӀамига хьаьший. Тайп-тайпара яхьаш, викторинаш, ловзараш дар цига. Тахан дуккханешта духьалъэттар цу моттига истори, хьалхара гӀа боаккхаш хинна денош, дӀаьхача шерашка нийсденна хувцамаш.
25 шера цу лагера болх дӀахьош, вай массане кхетадаьд, «Аьрзи» берашта салаӀа, сакъерда эггара дикагӀа, хозагӀа йола моттиг йолга. Массахана иштта берий дегаш гӀадкхувлаш латтийла из лагерь!
