Келаматанаькъан Махьмуд-Ӏаьла Ӏалий-Юртарча гимназе дешара цӏай долча хилар
Гӏалгӏайчен Кулгалхо Келаматанаькъан Махьмуд-Ӏаьла дешара цӏай дездеш хилар Наьсарен кхален дешархошца цхьана, цо дакъа лаьцар, Ӏаьлий-Юртарча гимназе Хьалхара гургал тохача. Укхаза безбеш тӏаийцар хьаьший. Хоза лостам баь дешара моттига ков, хоза кийчъяь кабинеташ - деррига а берий йоакхо еш дар. Республикан кулгалхоша хьалхашка оттадеш дола, дешар массайолча оагӏорахьара чулоацам болаш дегӏадоаладара декхар дика кхоачашдеш я Гимнази, цо ший масалца из хьагойт. Укхаза деррига берашта лаьрхӏа да. Царна хьакхеллад дешара, кхоллама мел эшаш дола хьалаш.
«Гимназера керттера мах бараш бераш да. Тахан цар дог тохалу, дешара хьалхара гӏа боаккхаш, бакъда цунца цхьана царна цох цӏай а хилар, илли оалаш, халхабувлаш, байташ ешаш. Хоза хеташ хьежар боккхагӏбараш цар хьинарга, безамга, деррига гонахьа мел дар довза гӏерташ уж хиларга. Къаьстта баркал оал хьехархошта. Гимназе болх беш ба боккъонца шоай болх дика бовзаш бола говзанчаш. Цар новкъостал ду берашта начӏал гучадаккха, кхетам лу, цар ӏомаду бераш боккхагӏбараш лархӏа, бехктокхаме хила, Даьхе еза. Къаьстта из ди лоархӏаме да берашта, керда никъ дӏаболабеш хиларца. Дешара шераш дика, сийрда, доккхий толамаш доахаш хилда царна», - яздир Келаматанаькъан Махьмуд-Ӏаьлас ший телеграм-канале.
Цӏайна кхетачен доакъашхошка кхайкарал деш, республикан Кулгалхочо даькъалабийцар керда дешара никъ дӏаболабеш мел хиннараш, дег чура доагӏача дӏайхача дешашца ловца баьккхар царна.
Къаьстта баркал аьлар Келаматанаькъан Махьмуд-Ӏаьлас хьехархошта, цахадаш кхоллама низ хилба шуца, дукхача шерашка дахалда шо, оаш хьийхарий оагӏорахьара баркал а долаш, яхача дешашца.
Терко йоацаш бисанзар берий дай-ноаной. Республикан Кулгалхочо царна а ловца баьккхар; шоай тӏехьено деладолда шо, царех доаккхал де йиш йолаш хилда шо, аьнна.
