Россе къамий меттай Денца мехкахой даькъалабийцар Келаматанаькъан Махьмуд-Iаьлас
Россе Президента Путин Владимира чIоагIонца юкъедаьккха Россе къамий меттай Ди дездеш да вай тахан эггара хьалха! Цу доккхача цIайца мехкахой даькъалабувцаш къамаьл дир республикан кулгалхочо Келаматанаькъан Махьмуд-Iаьлас. Мехкадас белгалдир, гIалгIай мотт культуран, исторен бух, ноахала юкъера бувзам болга; ший овла, ваьнна моттиг лораяра, йовзара тIехьа саг эггара хьалха къаман метта сий де дезаш волга.
«Даьхенцара безам хестабеш, адам цхьоагIо, барт, лерхIам хилара тIахьехаш хинна цIихеза селий байтанча Гамзатов Расул малхавалар дездеча дийнахьа нийсденнад из ди. Бувцаш бола мотт тайп-тайпара бале а, дегаш массахана цхьанкхеташ, беркатеча хIаман тIехьа долаш хила деза яха цун дешаш геттара гарга, товш да тахан дукхача къамех латтача вай боккхача мехкага. Наьна метта хIама вай къаман массахана ший тайпара боча, хьамсара хиннад.
ГIалгIай мотт – из вай истори, культура, хьалха дIабахарашцара бувзам! Мотт эггара хьалха дезала юкъе хоз сага, цудухьа къаман метта хIама хIара фусаме лакха лоаттадар, из хозача оагIонца боаржабар вайх хIаране декхар да. Ший мотт лорабар, цун сий дар – шийцара лоархIаме оагIув лорабар да, - аьлар вай Мехкадас. - ВIаший культурай лерхIам болаш хилар, вай йоккхача паччахьалкхен хIама хьаллацар да, ала деза. Ший къаман мотт боаггIача боараме дега хьамсара, гарга болаш хила йиш яц, кхыбарий хIаманца лерхIам хиларца мара! Лоалахой, кхыча къамий Iадаташ лоархIаш, вIаший оагIув хьаллоацаш, гIо ийшача моттиге кулг дIа-хьа кховдадеш хиларца мара цхьоагIо хургьяц, хIаьта тахан вай къаьстта чIоагIа лораде деза уж гIулакхаш».
Лакхаленца, сийленца декаш хилда массахана, Россе къамий метташ. ДIаяха ха кхоаненца хотташ, ноахала дийна бола дагалоаттам, боккхача мехка культуран оагIонца дувзаденнараш лорадеш дола хIама да из!
