СВО бӏухошта машинаш дӏалуча кхетаче, дакъа лоацаш хилар вай мехкада Келаматанаькъан Махьмуд-Ӏаьла
Тӏема операцена юкъе дакъа лоацаш болча вай бӏухошта машинаш, иштта кхыйола эшаш йола хӏамаш дӏакхоачийташ кхетаче дӏаяхьа гулбелар Магасерча Барта майдан доазон тӏа. Цига дакъа лоацаш хилар вай мехкада Келаматанаькъан Махьмуд-Ӏаьла, иштта гулбеннарашта юкъе бар премьер-министр Сластенин Владимир, сенатор Илезанаькъан Микаил, Паччахьалкхен Думан депутаташ Бӏарахой Бекхан, Татренаькъан Муслим, мехкара керттера федеральни инспектор Гудов Залим.
«53 миллион сом мах бола хӏамаш яр бӏухошка дӏакхачийтараш. Царна юкъе бар саг чувоацаш гӏетташ бола 40 гӏирс, 15 квадроцикл, УАЗ, «Газель» машинаш, иштта оргтехника. Вай мехкадас Келаматанаькъан Махьмуд-Ӏаьлас белгалдир тӏема аренашка лелача бӏухой гӏулакхага хьажар, царна эшаш дола хӏама лоаттадеш хилар тахан лоархӏамеча, доккхача декхарех долга», - йоах «Сердалога» мехкарча Паччахьалкхера бенача хоамо.
Кердача машиний дӏоагӏаш, каьхаташ дӏаделар мехкадас командирашка, тӏема тоабашта хьалха латтарашка. Из болх чакхбаьлча; машинаш, кхыдола гӏирсаш латтача доазон тӏа дӏабаха, царга хьожаш хилар берригаш. Укх деношка ӏокхоачаргья машинаш тӏема операци йолча.
