Шелал хьаоттарца, цӀерцара хатараш даржарах хоам бу МЧС
Тахан, гуйран хьалхарча бетта 27-ча дийнахьа, МЧС керттерча моттиге дӀайихьача кхетаче дийцар шелал хьаоттарца лакхлуш долча хатарех, ма хулла кӀезигагӀа уж хургдолаш дӀакхахьа безача балхах. «Сердалога» из хоам бир цу моттигера.
Кхетаче теркалдир, шелал хьаотталехь, ший цӀагӀа хьалсага езача пишкашка, котёлашка хьажа везилга, хьалххе кийчо е езилга.
Цу оагӀонцарча балха кулгалхочун гӀонча волча Котанаькъан Ахьмада белгалдечох, дӀадахача шера цу оагӀонцара кхоачамбоацараш бахьан долаш бархӀ сага вахар хаьдад.
«ЦӀераш ювлара бахьанаш газ эккхарца, угар хьаӀарца; токацарча, газацарча гӀирсашта лерттӀа доал деш цахиларца дувзаденна да.
Хатараш ма хулла кӀезигагӀа хилийтара тӀехьа, из деррига хьалхадоаккхаш, хьехам беш, болх дӀакхахьа беза бахархошца», - дийцар Котанаькъан Ахьмада.
