Берашка лелхаш дола ловзоргаш ма леладайта, яхаш, кхайкарал ду МЧС
Мархий цӀай латтача деношка берашка лелхаш дола ловзоргаш ма леладайта, яхаш, кхайкарал ду мехка МЧС. Лелхаш йолча цу хӀамаша доккхий зенаш, хатараш доаржадаь дукха моттигаш я, цудухьа чӀоагӀа лоралуш хила беза царца. Цу оагӀонцарча гӀулакхашта тӀахьожам лоаттабеча кулгал деча Котанаькъан Ахьмада белгалдечох, хлопушка чура кхоачам боккхача низаца араэккх, чов ергйолча моттиге из кхетарах лоралуш хила беза.
«БӀаргашта, юхь тӀа, сердал телача гӀирсашта дӀатӀаерзаяь эккхийта йиш яц из. Бенгальски цӀераш ара мара йоагае йиш яц, хӀана аьлча йоагача хана унахцӀенон зе деш йола хӀама йоаржаю цар. ЦӀеношта юхе, тока саьргашта гарга кховса йиш яц шатлакхаш. Цул совгӀа, цу хӀамай хьал тохкаш дикка хьажа веза кӀопилгага, ха чакхъяьннайий, уж могаеш каьхат доаца лелха хӀамаш эца йиш яц.
