МЧС болхлоша, цӀераш йоае Ӏомалуш, къахьийгар
30.07.2024 20:21
Республике чакхбаьлар цӀераш йоае Ӏомалуш бола аргӀанара болх. Укх наькъа ГӀалгӀайче гӀолла йолча Россе МЧС ГУ хоам бера; шоллагӀча гӀата тӀарча ресторана ноанала цӀагӀа цӀи яьннай, аьнна.
ЦӀи дӀайоаярца халонаш нийслора, 70 кв. м дӀалаьца йоагача ресторане шоаш арабала могаш боаца нах хиларах.
ЦӀерца къовсам лоаттабераша а гӀо де оарцагӀа ухараша а, чура 15 саг ӀокӀалваьккха, дӀайоайир йоагаш латта моттиг.
Бувцача балха юкъе дакъа лоацаш хилар, 54 саги 8 тайп-тайпара техникеи.
