Илдарха-Гӏалан мэра белгалваьккхар Темарбенаькъан Мухьмад, «Ший ловзар» яхача телешоу толам баккхарах
Илдарха-Гӏалан мэра Дидиганаькъан Ахьмада совгӏаташца везвир шахьара вахархо Темарбенаькъан Мухьмад, «Ший ловзар» яхача федеральни телешоу цо толам баккхар белгалдеш. Из хоам «Сердало» газетага бир администраце зарбан болх лелабераша.
«Илдарха-Гӏалан №3 йолча юкъерча ишкола истори хьехаш волча хьехархочоа Темарбенаькъан Мухьмада Илдарха-Гӏалан кулгалхочо Дидиганаькъан Ахьмада ше къаьстта совгӏат делар, цӏихезача телевизионни ловзара юкъе цо дика дакъа лацарах. Цу проектага хьожаш ба Россе бахархой санна, кхыча паччахьалкхений нах а. Темарбенаькъан Мухьмада елар, цо дукхача шерашка лакха говзал йолаш болх барах, дешара даькъ тӏа дика къахьегарах, кхувш йоагӏа тӏехье Даьхенцара безам совбоаккхаш хьалкхееш хиларах лерхӏама грамота, иштта мах бола совгӏат»,- аьлар хоамо.
Из дика масал да вай бахархошта, шоай низах тешаш, шоай начӏал гойташ хилара», - аьлар шахьара кулгалхочо.
